Nongstoiñ, Jymmang 26: Hadien ka jingpynbna jong ka tnad ka pule puthi lyngba ka MBOSE, la ïoh jingtip ba lai ngut ki samla pule kiba na sor Nongstoiñ West Khasi Hills, ki la wan shakhmat bad paw bha ha ka result jong ka SSLC bad HSSLC ha kane ka kynti kaba mynta.
Kitei ki khynnah ki kynthup ïa ka Amelari Kyrpang Puweiñ Class X kaba la ïoh ïa ka kyrdan kaba 12 na ka thup jong ki 20 kaba pule ha ka Anderson Higher Secondary School Nong-stoiñ. Ka dei ka khun jong ka kong Belbet Berry bad u bah Arigo Lyngkhoi kiba na ka shnong Mawkawah.
Kawei pat ka dei ka Dasukmynsiem Dkhar Class XII kaba la ïoh ïa ka kyrdan kaba 4 na ka thup jong ki 10 kaba pule ha ka skul Anderson Higher Secondary School Nongstoiñ, ka dei ka khun jong ka Baïamonlang Dkhar bad u bah Fullmoon Syiem kiba na ka shnong Nongpyndeng.
Katba na ki shynrang dei tang u Springfield Snaitang Class X u ba la ïoh ïa ka kyrdan kaba 8 na ka thup jong ki 20 ngut. Une u samla u dei u ba pule ha ka skul Sibsingh Memorial Government Higher Secondary School Nongpyndeng, u ba dei ruh u khun jong ka kong Naravell Snaitang bad u bah Reinstarfield Nongsiang kiba na ka thaiñ Maweit.
