Shillong, Jymmang, 26: Ki nongïalam ka Education Cell jong ka Khasi Students Union (KSU) Seng Kmie ha ka miet shiteng synñia sngi Thohdieng ha ka por 1:00 baje mynstep ki la leit jurip ïa ka PGT College, Shillong hadien ba la ïoh jingtip ba ki samla ki la sah miet ha phyllaw jong kane ka College tang ban ïoh ïa ka Form na ka bynta ban ïoh bteng ïa ka jingpule Bachelor of Education (B.Ed) ha kane ka College.
Katkum ka jingtip ba la ïoh lum, la ïathuh ba ki samla ki la ap laiñ lypa naduh dang step phyrngab hadien ba ki bor pynïaid jong kane ka College ki la pyntip ba ïa ki Form yn sam tang 150 tylli ha ka 24 bad ka 25 tarik bad sa 200 tylli ha ka 26 tarik u Jymmang, 2023.
Na ka liang jong ki nongïalam ka KSU ki la rai ban leit ïakren bad ka tnat Pule Puthi jong ka Sorkar Jylla ha kaba ïadei bad ka jingdawa ban kyntiew ïa ka jingdon jong ki Seat pule ha kane ka College namarba ïa mynta ki Seat ki don tang 32 tylli.
