Shillong, Jymmang, 26: Ka State Tobacco Control Cell (STCC) jong ka Jylla Meghalaya ka la ioh jingithuh da ka World Health Organization (WHO) na ka bynta ka jinglah ban pynduna ia ka jingpyndonkam duma. Man la u snem, ka WHO ka ai jingithuh ia ki riew shimet bad ki kynhun ki ba lah ban wanrah jingkylla ha ka imlang sahlang da kaba pynduna ia ka jingpyndonkam duma. Ha une u snem ia ka award WHO Director-South-East General’s Asia Region Award la ioh rah da ka State Tobacco Control Cell.
Ka anti-tobacco campaign ban pyrshah ia ka jingdih duma ka la ioh shisha ia ka jingjop da ka jingïashim bynta da ki 4,9 lak ngut khynnah na ki 7,975 tylli ki skul ha ka jylla. La sakhi ia ka jingia shim bynta jong ki phew lak ngut ki khynnah pula ha ki campaign ba la dep pynlong ha ki bnai ba la dep. La lah ruh ban pynsngewthuh paidbah sha ki 3,500 tylli ki shong ha khap sor, lyngba kine ki campaign ki ba la pynlong ha kylleng. Ha ba khein kyllum, la sakhi ruh ia ka jingpynlong 7,388 tylli ki jingïaid paidbah ban pynsngewthuh ia ki paidbah halor ka jingma ka jingdih duma.
U Myntri rangbah ka Jylla Meghalaya u Conrad K Sangma, u la ong, “Ngi dap da ka jingsarong ia ka Meghalaya’s State Tobacco Control Cell na ka bynta ka jinglah jong ki ban trei shitom haduh ban da ioh jingithuh bad ruh ia ka ne ka award na ka WHO. Kane ka jingioh ia kane ka award ka dei ka sakhi jong ka jingtrei shitom jong ka kynhun ban pynneh pynsah ia ki jinghikai bad ban pynsngewthuh paidbah ia ka jingkordor ka koit ka khiah. Kane ka jingioh khusnam na ka WHO kan nang pynshlur ia ngi ban kiar na ka jingpyndonkam duma, ban ioh ka lawei ka ba phyrnai, kaba koit ba khiah na ka bynta ka Jylla hi baroh kawei..”
Haba kren ha kane ka sngi, ka myntri ba dei khmih ia ka tnat ka koit ka khiah, ka Dr. Mazel Ampareen Lyngdoh, ka la iaroh ia ka jingtrei shitom jong baroh kiba donkti ban pynsngewthuh paidbah ia ka jingma u duma, ka la ong, “ka Jylla jong ngi ka da sngewsarong halor ka jingioh khusnam na ka WHO, ka pynshisha ia ka jingtrei shitom jong baroh ki ba don bynta ban pynioh ia kane ka award naduh ka tnat ka koit ka khiah, ka tnat pule puthi, ka tnat Home (Police) bad baroh ki shnong ngi lah lah ban duna ia ka jingpyndonkam ia u duma. To ngin ai ka jingiaroh ia ki khynnah skul, ki skul baroh kiba la donkti ban shimkhia ban pynlong ia kine ki signature campaign, ki jingïaid paidbah, bad kiwei kiwei ki program bapher. Ka dei ka jingiashim bynta jong phi baroh ka ba wanrah ia kane ka sngi ban ioh pdiang ia ka khusnam na ka WHO. Haba ngi lehkmen ia kane ka khyllipmat, to ngi nym shongjahthait hynrei ngin trei shitom ban nang ioh shuh ia ki jingithuh. Ryngkat lang ngin iaid shakhmat da ka jingiatylli ban wan rah ia ka Jylla ka ba koit ba khiah, ka ba lait shisha na ka jingpyndonkam ia u duma ha baroh ki shnong ki thaw. To ai ba kane ka award kan ai mynsiem ia ngi ban trei shitom shuh shuh ban poi kham shajrong bad ba ngin ioh ka jylla ka ba lait na ka jingpang bampong”.
Ka State Tobacco Control Cell ka la ioh ia ka jingithuh na ka WHO, da ka jingiatreilang bad ka tnat pule puthi bad ki bor pulit ka jylla, bad lyngba ki program ba pher bapher. Kane ka program, ka la wanrah shisha ia ka mynsiem ia treilang ban pyllait ia ki shnong ki thaw na ki kynjri jong ka jingdih duma
U Sampath Kumar, Principal Secretary & Development Commis-sioner, Department of Health & Family Welfare, Government of Meghalaya, u la pynpaw “Ka jingkylla kan wan lada ka don ka jingiatreilang na baroh ki tnat treikam ka sorkr bad ki riew shimet. Ka jingiaroh ka leit sha u myntri rangbah ka jylla, u Conrad Sangma, u ba la pynieng shisha ia ka nongrim ban iatreilang hapdeng ki tnat treikam bapher jong ka Sorkar jylla na ka bynta kano kano ka kam.”
U Ram Kumar S, IAS, Secretary of Health & Family Welfare Department, Government of Meghalaya, u la ai khublei ia baroh ki skul ha ka jylla, “Nga dap da ka jingkmen shisha ban iohi ia ka jingiashim bynta shitrhem jong ki khynnah ban hikai bad pynshlur ia ka imlang sahlang ban lait na ki jingsniew u duma da ki jingiaid paidbah, ki signature campaigns ha ki jaka paidbah. Kine ki skul, da k jingiatreilang bad ka Sambandh Health Foundation ki la lah ban pynphriang ia ka khubor sha kiba bun ki jaka, wat shaduh ki jaka kyndong. Tylli lang ngi lah ban wanrah ia ka imlang sahlang ka ba lait na ka jingkhum jingteh u duma”.
Ka Dr. Lana Lyngdoh, Nodal officer jong ka STCC, ka la ban jur halor ki jingdonkam ki campaign bad ka la ong, “Kane ka campaign ka dei kawei na ki lad ki lynti ba khlain bor ban pyni ba ngi kyntait ia kine ki jingpynjot ia ka imlang sahlang, bad ba ngi kwah ban im ka jingim kaba bha bad kaba kmen. Man ka jingsoi ne ka signature ba la ioh lum, ka dei ka sur pyrshah ia u duma, ka ba pynktik mynsiem ba ngin ialeh ban lait na ki jingteh u duma bad ba ngin ioh ka pyrthei ka ba lait luid na u duma.
Kine baroh ki dei ki jingiatreilang jong baroh na ka State Tobacco Control Cell’s (STCC) bad ki tnat treikam bapher jong ka sorkar, haduh ki skul ha ka jylla ki ba la pynpaw ka jingthrang ban rat dyngkhong ia kane ka jingsniew u duma.
