Markhmat bad u Myntri Rangbah ïoh lad ki paidbah Laskeiñ Block ban ïathuh ïa ki jingeh

Shillong, Nailar 08 : Kawei ka longkmie ka la jaw ummat brup ha ka por ba ka ïathuh ïa ka jingsniew jong ki surok ha ka shnong jong ka, kaba hap hapoh ka Laskein C&RD Block ha West Jaiñtia Hills ha ka prokram CM-Connect. Kane ka longkmie kaba dei na ka shnong Umsaliat ka la ong ba katei ka surok ka la neh beit kumtei naduh ba ka dang rit.
“Naduh ba nga dang khynnah nga la ïohi ba kane ka surok na shnong jongnga sha Iooksi ka neh beit kumjuh khlem pyndep. Man la ka elekshon, ki kyrtong kiba ïakhun ki kular ba lada ki shah jied, ka surok kan sa dep. Hynrei ka la sah kum ka jingkular kaba khlem urlong ha kine ki 20 snem ba la dep,” ong kane ka longkmie.
Haba jubab ïa kane, u MLA ka thaiñ ba dei ruh u Myntri Sorkar u la jubab da kaba ong ba ïaka jingkular la pyndep namar ïa kane ka surok la dep ban mang tyngka bad ka jingpyntrei kan sa sdang noh shen. Ka jingjngai na Umsaliat sha Iooksi ka long tang kumba 2.5 Kilometer ei ei.
Ki la don haduh kumba 40 ngut ei ei ki paidbah nongshong shnong kiba la wan ban pynpaw ïa ki jingeh bapher bapher ba ki don ha katei ka sngi.
Ha ka CM Connect mynta ka sngi, ki nongïalam shnong, ki nongsynshar shnong, bad ki paidbah baroh ki la shim kabu ban ïakren markhmat bad u Myntri Rangbah bad pan ïa ka jubab halor ki mat bapher bapher. La ïohi ba bun ki pynpaw ïa ka jingbitar pyrshah ïa ka jingslem jong ki kam, ka jingbym biang ka jingpyntreikam bad ka jingpynslem ban pyllait ïa ki skhim.
U Myntri Rangbah dalade u la sngap ïa kitei ki jingïathuh jong ki bad pynshai ruh ïa ki jingartatien bad kular ba ïa kitei ki jingeh ba ki la pynpaw kin sa pynbeit.
Ki mat ba kham kongsan ba ki paidbah ki la pynpaw lada shim kyllum ki long halor ka jingbym biang ki surok kali, ka jingbym don ki jaka pule ha ki shnong, ki jaka sumar kiba biang, ki jait jingbam ba tei ba ju sam sha ki khynnah rit bad ruh ki jingeh kiba ïadei bad ka jingpyntreikam ia ka JJM, bad kiwei kiwei.
Na ka liang u Myntri Rangbah haba jubab u la ong ba ïa ki jingtei jong ki skul ha baroh kawei ka jylla Meghalaya la sdang ban pynbha bad ïa ki mat ba la kdew halor ki skul na Laskein block, yn sa shimkhia da ka sorkar. Halor ka jingkyntiew ïa ki jaka sumar Myntri Rangbah u la pyntip ba ka sorkar lyngba ka projek kan kyntiew kyrdan mynta ïa ki PHC sha ki CHC. U la pyntip ba na Laskein block ruh, ka tnad kan sa jied ïa ki jaka sumar ban kyntiew kyrdan.
“Ka jingmut jong ka CM-Connect ka long ban sngap ïa kaei kaba ki paidbah ki don ban ong. Lyngba kane ka prokram, ngi lah ban tip ïa ki jingdonkam jong ki briew jong ngi bad ban shim ïa ki rai katkum ka jingdonkam jong ki,” u la ong, haba pyntip ba ha man la ka prokram jong ka CM-Connect, ki paidbah ki pynsngew ïa ki jingeh baki kynduh halor ki surok.
“Kumba 1600 tylli ki shnong ha kane ka jylla Meghalaya kim don satia ïa ki lynti syngkien kiba biang. Ïa kine ki surok ym lah ban bei tyngka da ka sorkar pdeng lane da ka National highway, PMGSY ne da ka state scheme namar ba kam ïahap satia bad ki kyndon. Ka sorkar jong ngi ka la pynmih ïa ka skhim Chief Minister’s Rural Road Connectivity Scheme ban pyntikna ba kum kine ki surok ki bym ïahap ha kano kano ka skhim lah ban pynrung. Ngi la jied bun tylli ki surok kiba kum kine, bad ngi dang lum ïa ki surok thymmai na ki jaka nongkyndong ba ïahap ha kine ki skhim”, u la bynrap.
Kiba bun ki la pynpaw ruh ïa ka jingdonkam ïa ki jingtei kum ki madan ïalehkai phutbol, ki police outpost khamtam ha ki thaiñ khappud, ki transformer, ka jingdonkam ïa ki jaka treikam jong ki Village Organizations, ka jingdonkam ïa ki jaka thoh eksamin SSLC, ki bank, ki jingkieng ïaid kjat, ka jingkyntiew ïa ki jaka jngohkai, ki ïew nongrep bad kiwei kiwei.