Shillong, Nailar 08: Ka jingthmu ïaid Yatra ne Pilgimage da ki riewngeit Hindu sha Kren Mawjymbuiñ ha Mawsynram ha ka 10 bad 11 tarik mynta u bnai, ïamynta ka la sangeh shuwa, namar ba ka ïingbishar High Court of Meghalaya, ka la rai ban bishar biang ha ka 14 tarik mynta u bnai.
Lah ban kdew hangne ba ka Society jong ki Hindu ka la ujor sha ïingbishar jong ka Meghalaya halor ka jigbym ai NOC ka Dorbar Shnong Mawsynram ban leit pynlong jingmane blei ha ka krem Mawjymbuiñ kaba don ha Mawsynram.
Ha ka jingshim bishar hynnin ka sngi, ka ïingbishar ka la khot hajir ïa ka Dorbar Shnong Mawsynram, ïa ka DC East Khasi Hills, u SP East Khasi Hills mynta ka sngi halor kane ka kynrum kynram.
Ha ka jingshim bishar mynta ka sngi, na ka liang ka Dorbar Shnong Mawsynran, lyngba u nongsaid aiñ jong ka, u Bah VGK Kynta, ka la ong ba ka jingbym ai NOC mynta ka snem kadei namar ba kiba wan ïaid Yatra kim shym la burom ïa ki kyndon ba la buh da ka Dorbar Shnong, wat lada na ka liang ka Shnong ka la ju ai jingbit naduh u snem 2011 haduh u 2023.
Namar kane ka jingbym burom, u nongsaid aiñ, u la ïathuh hakhmat ka ïingbishar ba ka Shnong kam shym la ai jingbit shuh mynta ka snem.
Na ka liang u Nongbishar, u Justice Bah HS Thangkhiew u la ong ba haba naduh u 2011 haduh u 2023 la ai jingbit balei pat ka Dorbar Shnong kam ai biang mynta ka snem bad ïa kita ka jingpynkheiñ kyndon yn sa peit noh ha ka snem ban wan.
Hynrei na ka liang u Bah Kynta, u la ong ha ka jingtreikam ki Dorbar Shnong Khasi, u Rangbah Shnong marwei, um lah ban shim ïa ka rai bad dei tang ka Dorbar Shnong kaba lah ban rai.
Kumta na ka liang ka ïingbishar ka la buh ban shim bishar biang ha ka 14 tarik bad bthah ruh ba ka Dorbar Shnong kan wan ryngkat bad ka jubab la kan ai ne em ïa ka jingbit ne ka NOC na ka bynta kane ka Yatra.
Ha kane ka jingshim bishar, ka DC jong ka East Khasi Hills ka Kong RM Kurbah bad kumjuh ruh u SP ka East Khasi Hills, u Bah S. Nongtnger, ki la wan ai jingpynshai.
