Shillong, Nailar 08 : Watla ka sorkar jylla kam pat pynbna lano ka elekshon MDC kan long ha KHADC kumjuh ruh ha JHADC hynrei ki tyllong khubor ba la ïoh lum ki ïathuh ba kin don bun ki MDC khamtam na rilum Khasi kiba la don mynta ha ka jingartatien ba kin mih ïakhun biang ha kane ka elekshon MDC kaban sa long.
Ki tyllong khubor ki ïathuh ba ki don bun ki daw kiba long ka dawbah ba kine ki MDC kin shim noh da katei ka rukom pyrkhat ban kynran dien.
Kumba long haduh mynta hi, ki don lai ngut hynrei ym lah pat ban tip ba kane ka lah ban nang kiew lane ka lah ban nang hiar ruh. Haba pyrshang ban tih bniah ïa ka daw tynrai la ïoh jingtip ruh ba ka jingkylla kynsan ka saiñpyrthei hi kadei kawei na ki dawbah nalor kiwei kiwei ki daw shimet jong ki.
Na ka liang u Mawphor u la ïoh jingtip ruh ba arngut na kitei ki dei na kajuh ka party bad uwei pat u dei na kawei ka party. Kaba kham phylla ka long ruh ba wat ki nongïalam jong ka party ki la dep tip ïa kane ka jingthmu jong kitei ki MDC tangba ki dang sngap jar jar.
Uwei na ki nongïalam party u la ong, “Ngi la bna ïa kane tangba ngim pat lah ban ong ei ei namar ïoh kine kiei kiei kin kylla biang hadien ba la pynbna ïa ka elekshon MDC.”
Ha kawei pat ka khubor, la ïoh jingtip ruh ba kin don ki MDC ba mynta kiba lah ban phet seng noh shwa ka elekshon. Kine ki MDC ki ap beit sa tang ka por kaba biang ban kynthih noh sha kawei pat ka party.
Tangba la ïoh jingtip pat ba kine ki MDC watla ki thmu ban kyntiap seng noh hynrei kxzsam pat don kano kano ka jingpyntikna ba kin ïoh tiket ban aireng ha ka elekshon kaban sa long.
Dang shen la phriang ruh ki khubor ba don ki MDC kiba sdang ban wad constituency noh shawei na bynta kane ka elekshon. Tangba ïa kane ym pat lah satia ban pyntikna namar na ka liang kine ki MDC bad ruh ki nongïalam jong kitei ki party kim shym la treh satia ban kren ei ei halor kane ka bynta.
Tangba ym lah pat ban tip ba katei ka sienjam ba kitei ki MDC ki shim ïoh ka dei tang ban peit ïa ka jingsngew ki paidbah ha ki constituency la ki dang kwah ne kim kwah shuh ba kin mih aireng biang ha ka elekshon ban wan.
