Shillong, Naiwieng 03 : Ki sengbhalang bapher bapher ki la pynkhreh ban pynkynmaw biang ïa ka jingdawa Inner Line Permit hakhmat u Amit Shah, Myntri Kampohiing ka Ri ha ka jingwan jong u shen sha Nongbah Shillong.
Haba kren bad ki lad pathai khubor hadien ka jingkynduh ïa u Symbud Myntri Rangbah ka jylla, Bah Prestone Tynsong kitei ki san seng ki la ong ba ki kyntu jur ïa baroh ki 60 ngut ki MLA ba kin kynduh bad kylli ïa ka sorkar pdeng halor ka jingpynslem ban shim rai ïa ki ar tylli ki Resolution ba ïadei bad ka jingdawa ILP bad kawei pat kaba ïadei bad ka jingdawa ithuh noh ia ka Ktien Khasi bad Garo ha ka Khyrnit kaba Phra.
U Nongïalam katei ka kynhun Bah Robertjune Kharjahrin u la ïathuh ruh ba ha ka jingïakren bad u Symbud Myntri Rangbah la pyntip ba u Amit Shah un sa wan biang sha nongbah Shillong ha kine ki khyndiat taiew ban wan
“Kumta, ngi la pynpaw ba ngi kwah ban ïa kynduh markhmat bad u Amit Shah ha ka jingwan jong u sha Shillong bad ngi kwah ruh ban ïohi ba baroh 60 ngut ki MLA kin leit bad kynduh markhmat ïa u ban kylli halor kitei ki ar tylli ki Resolution bad balei ka sorkar pdeng ka shimpor ban rai ïa ki mat jingdawa ba ki paidbah ki dawa,” u la ong.
Lah ruh ban kdew hangne, ba kitei ki mat ki dei katto katne na ki 9 tylli ki mat jingdawa jong ki san seng hapoh ka lama jong ka ‘Save Hynñiewtrep Mission’.
Haba ïadei pat bad ka ishu bamsap, na ka liang u heh ka HYC u la ong ba u Symbud Myntri Rangbah ka jylla u la pyntip ba ka Political Department ka la dep ban phah ïa ki kaiphod jong ki jingtohkit bapher bapher sha baroh ki MLA.
“Ngi la dawa ba ïa kitei ki kaiphod dei ban buh ha rynsan paidbah (public domain),” u la bynrap biang da kaba ong ba lada ïa ki heh pulit lah ban kem balei pat ka ain kam long kumjuh ïa baroh kiba don.
Haba ïadei pat bad u pud u sam, ki san seng ki la buh jingkylli ruh ïa ka sorkar la ka lah neem ban pynbeit ïa u pud u sam ha ka kylla kaba ar shwa ka elekshon.
