Shillong, Naiwieng 03 : Ka kynhun ki san seng ba kynthup ïa ka HYC, HANM, EJNC, JSM bad ka CORP
ha ka sngi Palei ki la dawa na ka sorkar jylla lyngba u Symbud Myntri Rangbah ba kadei ban ai noh da ki kynja song kyrpang (allowances) khnang ba kito kiba sah ha Them-ïewmawlong kin mih noh na katei ka jaka.
Haba kren bad ki lad pathai khubor u nongïalam ka kynhun, Bah Robertjune Kharjahrin u la ong ba ki la dawa ruh ba ïa kito kiba shu wan shong beaiñ ym dei satia ban ai quarter hynrei ban shu beh beit hynrei ïa kito kiba trei shisha ha ki ophis ha ki tnad bapher bapher dei ban pynkynriah noh ïa ki sha kawei pat ka jaka ba la pynkhreh.
“Ngi la kren shai ba ïa ki dei ban pynkynriah noh shwa ba kane ka elekshon kan wan. Namar ynda la kut ka elekshon ngim tip kan jia aiu namar ngi la mad ïa kane ka ishu na kawei ka por sha kawei pat ki buhteng shi buhteng,” bynrap biang u Bah Robertjune haba kren bad ki lad pathai khubor.
La ïathuh ruh ba na ka liang u Symbud Myntri Rangbah u la kubur ba ki don kiba sah beaiñ hangtei ha Themïewmawlong hynrei kiba bun hi kidei kiba trei ha ki tnad bapher bapher jong ka sorkar jylla.
U la ong ruh ba lada kitei kiba sah hangtei ki pdiang ïa katei ka Blueprint, ka sorkar ka hap ban shna ia ki jaka sah jong ki. Kumta na ka liang ki san seng ki la kyntu ïa u Symbud Myntri Rangbah ba kam dei satia ban ap haduh ban da dep shna ïa kitei ki quarter.
“Ngi la dawa ïa ka sorkar ba haba ki pdiang ïa ka Blueprint ka sorkar kadei ban shimti noh ia katei ka jaka bad ai noh ia ki da ki song kyrpang (allowances) ba kin lah ban leit shongwai noh hangno hangno ym ba kin ap haduh ban da dep tei iing quarter jong ki.”
