Raikhoh ka Education Department, i kumba kan dkut: Martle N Mukhim

Shillong, Naiwieng 03: U Executive Member ba peit ïa ka tnat Pule Puthi jong ka Khasi Hillis Autonomous District Council u Bah Martle N Mukhim u la ong ba ka jinglong jingman ka tnat pule puthi jong ka sorkar jylla ka sniew dur palat liam ban ïa ki por baroh bad ong ruh ba i kumba kan khyllem syndon hi jraiñ.
Haba jubab ïa kane ka jingïatai, u Bah Martle u la pynpaw ïa ka jingsngew ïahap bad ka jingong u MDC ka Mawhati bad ong ba ka jingeh kaba ki nonghikai ha ka jylla ki kynduh ka long kaba shyrkhei haduh katta katta haduh ba kin hap thiah surok bad ban ïakhih na ka por sha ka por wat ban ïoh ïa ka tulop ba dei hok jong ki.
U la ong ruh ba ka jingeh kaba ki nonghikai bad ka jinglong jingman ka pule puthi ha ka jylla ka dei namar ym don briew kiba biang bad kiba lah ban peit ïa kane ka tnat kaba kongsan eh jong ka jylla.
“Ngim pat ju kynduh kum kane ka jingeh ha ka jylla bad ka daw hi ka dei namar ym don briew kiba bit ba peit ïa kane ka tnat kaba man ki kyrtong ki kam ha ka ilekshon ba ka long kaba kongsan tam katba ynda ki la jop ym ju don uwei ruh uba shim khia ïa kane bad kumba long mynta lei ka raikhoh i kumba kan dkut noh” u la ong.
Haba ïadei bad ka jingshah set tulop ba khah khah ki nonghikai u Bah Martle u la ong ba ka long ruh kaba da sngewlehraiñ ban ïohsngew.
“Ki nonghikai ki duh tulop da ki bnai aiu kan jia lada ngi duh ma ngi tang shibnai ruh” u la ong bad bynrap “nga don ka jingsngewkhia kaba khraw ïa ki nonghikai jin lada dei ba ngam teh than ka kam ngan jin lada leit shim bynta lang bad shah thngan ne ïaid paidbah lang bad ki nonghikai”, u la ong.
U Bah Martle u la ong ba ka jingeh kaba ki skul ki ïakynduh ka dei ym tang ha kane ka kynti hynrei ha ki snem kiba la leit noh hynrei ka jingeh kaba ki skul ki kynduh ki tam duh mynta.
Haba shim bynta ban ïatai halor ka Motion ba la rah da u MDC ka Shella Constituency u Bah Teiñwell Dkhar u MDC ka Mawhati u Bah Charles Marngar u la ong ba ka jingbym lah ka sorkar ban peit ïa ki ki skul ha ka jylla khamtam eh ki Primary School bad ka jingeh kaba ki nonghikai ki ïa kynduh ka la pynsohsat hi khait ïa ki nonghikai.
U Bah Charles la ai jingmut ruh ba ka konsil ka dei ban shim biang noh na ka sorkar ban pynïaid ïa ki skul Primary, u Bah Martle u ong ba kam ju don kano kano ka jingtyrwa na ka sorkar ban pynïaid biang noh da ka konsil ïa ki skul kiba ka sorkar ka la shimti ban pynïaid da lade ïa ki skul ba ju pynïaid da ka konsil ha ki snem kiba kham mynshuwa.
U Bah Charles u la ong ruh ba ka jingïakynduh jingeh ki nonghikai skul Adhoc, SSA bad wat ki nonghikai kontrak ka la pynlehraiñ shibun ïa ka jylla bad ka pynduh ruh wat ïa ka hok pule ki khynnah.
U Bah Martle u la ong ruh haba phaidien sha ki snem kiba kham mynshuwa ha ki por kiba ka KHADC ka dang pynïaid ïa ki skul ki mih kum kine hi ki jingeh bad ynda la pynïaid ka sorkar ruh ka mih ka jingeh kaba kham palat pynban.
U la ong ruh ba ha ka jylla jongngi lada ym don ki skhim kyrpang jong ka sorkar pdeng kum ka SSA ka Pule Puthi ha ki Primary Level ka la khyllem naduh bun bun snem mynshuwa.
“Ngam sngewthuh shuh kaei ka daw ba ka shem jingeh ban siew na ka pla ka sorkar jylla ïa ka tulop ki nonghikai namar kum ïa ki nonghikai SSA 90% na ka tulop jong ki la siew da ka sorkar pdeng bad tang 10% ka sorkar jylla ka dei ban siew” u la ong.
U la ïathuh ruh ba ha ki snem ba kham mynshuwa ha ka por ba ka sorkar kam lah shuh ban siew tulop ïa ki nongtrei ka MeSEB, ka la shim kylliang na kiwei pat “hynrei balei ym lah ban leh ïa kane ruh ha ka tnat Pule Puthi” u la buh jingkylli.