Shillong, K’Lyngkot 11: Ka kynhun ïalehkai jong ka Mawkhar Sports Club bad ka Lawsohtun Sports Club ki la mad ïa ka jingïakhaid kaba mar 2-2 kol ha ka lympung ïalehkai First Division jong ka Shillong Sports Association kaba long hynne ka sngi Palei ha madan First Ground , Polo.
Ka Mawkhar SC ka la sdang ïa ka samoi ïalehkai jong ka da ki ar kol tang hapoh ki san minit lyngba u Leversharp Syiemlieh ha ka minit kaba 3 bad na u Pynshailang Dkhar ha ka minit kaba 5 jong ka kylla step.
Hynrei ha ka jingïalehkai kaba kham itynnad ha ka kylla miet, ka Lawsohtun ka la ïoh ban pynphai noh bad pynïakhaid artad ïa ka jingiakhun. Ïa kitei ki kol kiba kongsan tam na ka bynta kynhun la ïoh ban thep da u Peter Lyngdoh ha ka minit kaba 82 bad ïa ka kol kaba ar bad kaba khatduh la ïoh ban thep da u Debaspar Rani ha ki minit shwa ban kut artad ka por ïalehkai kata ha ka minit kaba 98 jong ka kylla miet.
Ka jingïakhun kaban wan pat kan long hapdeng ka Nongrim Hills SC pyrshah ïa ka Umphyrnai SC ha ka sngi Saitjaiñ ha ka por 2:15 baje janmiet.
