Jowai, K’Lyngkot 11: Ka ophis u District Sports Officer, West Jaiñtia Hills District, Jowai mynta ka sngi kala pynlong ïa ka prokram ban pdiang burom ïaka Dong Musa (Torch Relay) kaba la wan poi ha nongbah Jowai, shi bynta naka 5th Meghalaya Games 2024 ka ban sdang naduh ka 15 tarik haduh ka 20 tarik u Kyllalyngkot, 2024 ha nongbah Tura, West Garo Hills District.
Ïa kane ka 5th Meghalaya Games 2024 la pynlong daka tnad Directorate of Sports & Youth Affairs, Meghalaya, Shillong ha ryngkat ka jingïatreilang bad ka Meghalaya State Olympic Association.
La sdang ban rah ïa ka dong musa naduh Ummulong nangta la rah da ka kali haduh Mihmyntdu Lad College ha kaba ki nongïalehkai (Athletic) jong ka West Jaiñtia kila shim bynta da ka jingmareh ryngkat ka katei ka Dong Musa na Mihmyntdu Lad College sha Mooralong (Vishal), na Mooralong (Vishal) sha Ladthadlaboh Market, na Ladthadlaboh Market sha Ladthadlaboh (V Mart), na New Hill (1-Family Mart) sha Marian Hill H/S School, na Marian Hill H/S School pynkut ha Stand Ummulong (Iawmusiang).
Ha Stand Ummulong (Iawmusiang) ka ophis u DSO bad ki bor District kila pynlong ïa ka jingïalang, ha kaba ka kong Dayarisa Lyngdoh kala pynïaid ïa ka prokram, ha ka jingdonlang u kongsan ma Wailadmiki Shylla (MLA), U Deputy Commissioner ka WJHD bah B.S. Sohliya, u DSO ma K. Passah, kong Stefiny Rapsang SDO EJHD, kong Balarina Syiem DSO Nongstoiñ, Vice President WJDSA ma Patrick Lamare, ki dkhot ka WJDSA bad ki Athletic jong ka District.
La pyntip da u u DSO ma K. Passah ha kane ka 5th Meghalaya Games 2024 kan don ruh ki jait jingïalehkai Tynrai jong ki longshwah jong ka jait bynriew hapoh ka Jylla (Traditional Game) kiba kynthup ïa ja Rah Mookhrah, Dat Moopoin bad ka Wa·pong Sika
U kongsan jong kane ka sngi u ma Wailadmiki Shylla ha ka jingkren ula ai mynsiem ïa ki nongïalehkai jong ka West Jaiñtia Hills ba kin long kiba trei shitom bad kiba don ka mynsiem jingïaleh khnang ban kin ïoh rah ïa ka nam bad ka burom ïa ka District hi baroh kawei.
Katba na ka liang u Chief Guest ha katei ka sngi ula aiti ïaka Dong Musa ha u bah Beningstar Lyngkhoi (International Athlete) uba dei u Torch Ambassador bad ïa kane ka Dong Musa yn leit rah shaduh nongbah Tura. La pyntip ba ki nongïalehkai Sports jong ka West Jaiñtia Hills District kin mih na Jowai ha ka step ka 13 tarik u Kyllalyngkot, 2023.
