Shillong, K’lyngkot 30: U Myntri Rangbah, u Conrad Sangma, mynta ka sngi, u la plie ia ka jaka pynlang um kaba itynnad kaba la shna da kaba dam ïa kawei ka wah ha ka Shnong Mawrah kaba don ha lynti na Mawjrong sha Khatarshnong.
Ïa kane ka jaka pung ne ka water reservoir lah ban pyndonkam na ka bynta kiba bun ki jingdonkam, kum ban tan um sha ki jaka rep, ban pynlong umdih, ban pynlong um jaka saitjaiñ bad kiwei kiwei.
Ïa kane ka pung la shna da ka dam kaba la tei kynroh itynnad bha bad la pyntrei da ka tnad Soil and Water Conservation ryngkat ka jingïatreilang bad ka Shnong Mawrah.
Halor jong ka dam la shna ïa ka jingkieng kaba itynnad bha bad sawdong jong ka pat la sna ïa ki jaka ïaidkai kiba i pyngngad.
Kane ka pung naduh ba dang shna ka la khring ïa kiba bun bha ki nongwan jngohkai pyrthei, kynthup ïa kiba na shabar jylla bad na shabar ri ruh kumjuh.
U Conrad haba kren ha ka jingïalang hadien ba la plie ïa kane ka pung, u la ong ba ka sorkar kan pynlut kumba 400 klur tyngka eiei ha kine ki lai snem ban wan na ka bynta ban shna ia ki pung ne ki jaka pynlang um, khnang ba ki paidbah kin nym mad jingeh ha ka liang ka um ka wah bad kine ki pung kin ai ka jingshakri na ka bynta ka rep ka riang, ka umbam umdih bad kiwei kiwei de ki jingdonkam.
