Shillong, Kyllalyngkot 30 : U Myntri ka tnad Pule Puthi Rakkam A Sangma ha ka Sngi Ba-ar, ula pyntip ba shen yn sa wanrah noh ïa lai tylli ki Common University Entrance Test (CUET) centre ha Jylla Meghalaya.
Haba ïakren bad ki nongthoh khubor, u Rakkam ula ong “Tang ban pyntip sha baroh ba myn shisngi nga la ïoh ïakren phone bad u DG ka National Testing Agency (NTA), New Delhi, uba la pyntip ïa nga ba na ka bynta ka Post Graduate Course, lai tylli ki CUET Centre yn sa buh noh ha Meghalaya- kawei ka Tura bad artylli ha Shillong”.
“Hynrei, ka shong kat kum ka jingdon jong ki samla pule, ki lah ruh ban plie kham bun ki centre hapoh ka Jylla” ula bynrap.
Kane ka jingkren jong u ka la mih halor ka jingïai mih ki jingkynnoh na ka kynhun Liang Pyrshah Voice of the People Party (VPP) ba ka Sorkar Jylla kam shym la leh eiei ban pynbeit ïa ka jingeh ba mad da ki samla pule kiba dei ïakhun ïa ka eksam CUET.
U Rakkam ula kyntu ïa ka VPP ba kan wan ïakynduh ïa u khnang ba un ïoh ban batai sha ki halor kane ka kam. “Lehse kane ka dei ka buit ba katto katne ki politician ki ju leh. Shu kheiñ ba lada don kaei kaei kaba jia, ki dei ban leh tang ban ïoh burom” ula ong.
Hynrei ula ong ba ka dei ka kamram jong ka Sorkar Jylla bad ka Tnad Pule Puthi kala pyrshang katba lah ban pynbeit ïa kane ka jingeh ki samla pule.
Ha kawei ka liang, u Myntri ula pynpaw ïa ka jingsngewkhia halor ka jingduna ki samla pule ka Jylla kiba pass ïa ka CUET bad ruh ïa kiwei kiwei ki eksam.
“La ïathuh ïa nga da u VC ka NEHU ba bun ki seat kila lait namar mynshem snem, bun bah ki seat kila lait ha NEHU namar ka jingbym pass ïa ka CUET. Nga kwah ban kyntu ïa baroh, ki samla pule jong ngi, ba kin pynkhreh bha ïa kum kine ki eksam” ula ong.
Ula ong ba lada donkam, ka Sorkar ka lah ban rai ha ka ban buh noh da ki coaching centre hynrei ïa mynta, ki jaka pule kila biang nadong hadong ban pynkhreh ïa ki samla pule ba kin ïaleh ïa kine ki eksam.
