Shillong,Kyllalyngkot 30 :U nongïalam ka NPP uba dei ruh u Myntri Sorkar u Rakkam A Sangma mynta ka Sngi Ba Ar u la kitbok kit rwiang ïa u kyrtong ka Congress na Tura Parliamentary Constituency u Saleng Sangma tangba u kren diaw pat da kaba ong ki paidbah te ki la duh jingshaniah ïa ka Congress ha ri lum Garo.
U Rakkam u la ong “ Nga sngewkmen ba une u MLA ba la laisien lai wat jongka Gambegre u la ïoh ïa ka tiket na ka Congress. Nga sngewtynnad eh ïa kane bad nga kit bok kit rwiang ruh ïa u na ka bynta ka election MP Lok Sabha. Hynrei ban jop ne ban rem ka lah ban dei ka jingphoh sniew jongu namar kumba long mynta ka Congress ka la tlot bha ha ri lum Garo tangba wat la katta ruh ym lah ban kheiñ troiñ namar ka election te ka election” .
“ Tangba kumba long mynta nga kwah ban ïathuh ïa ki paralok ba ka lyer jongka Congress kam da long shuh ha ri lum Garo. Ngam tip haduh katno u Saleng un lah ban pynkhie im ïa k a Congress. Dang shibnai mynta ngi da ïashongkai lang bad ngi dang ïakren halor kane ka juh ka phang bad ha katei ka por u la pynpaw ba un ym ïakhuh ïa ka election hynrei u don bok pat ba u la ïoh ïa ka tiket na ka Congress.
