Shillong, K’lyngkot, 30: U Symbud Myntri Rangbah ka Jylla u Bah Sniawbhalang Dhar uba peit ïa ka tnat (Prison) ha ka sngi Baar u la ïathuh ba ka Sorkar kam pat shim rai halor ka jaka ban shna ïa ka Central Jail.
U Bah Dhar u la ïathuh ba dang shen la tyrwa ban shna ïa ka Central Jail ha New Shillong Township.
Katkum ka jingong jong u, ïa ka soskular jingïamynjur ladep ïasoi hapdeng ka tnat Home (Jail) bad ka tnat Urban Affairs ban pynkynriah noh ïa ka Shillong District Jail sha New Shillong Township.
Haduh lai sien kynthih la pynlong ïa ka jingïalang pyrkhat kam hapdeng ka tnat Urban Affairs bad ka tnat Home (Jail). La mynjur ba ka tnat Urban Affairs kan shimti noh ïa ka jaka (ba don ka Shillong District Jail ba mynta) ban ïakylliang ïa ka jaka ha New Shillong Township.
U Bah Dhar, uba dei ruh u Myntri uba peit ïa ka tnat Urban Affairs u la ong ba ka New Shillong Jail kan long kaba ïaryngkat kyrdan bad ka Central Jail, ha kaba ïa ki koidi bad ïa kiba dang don hapdeng ka jingshah tian bishar yn sa pynsah la ka jong.
Haduh 25 akar ka Sorkar ka donkam ban ïoh ïa ka jaka ban shna ïa ka Jail ba thymmai.
U Bah Dhar u la ïathuh ba u la kyrpad ban pyndep noh ïa ka Nongstoin Jail khnang ban weng ïa ka jingkhapngiah jong ka Shillong District Jail.
Shuh shuh u la ïathuh ba u la pan ïa ka kaiphod halor ka jingpynkhlaiñ ïa ki bor pahara jong ka Jail kynthup ruh ïa ka Jowai District Jail ban khanglad ïa ka jingphet tuh ki koid.
“Hadien ba nga la shimti ïa ka tnat Home (Jail) nga la pan kaiphod halor ka jingpynkhlaiñ ïa ki bor pahara jong ki Jail da kaba pyndait ïa ki CCTV bad ban thung kham bun ki nongtrei. Ngi la phah sha ka tnat Pla Tyngka ban mang pisa ban thung ïa ki nongtrei khnang ban ïada ïa ka jingphet tuh ki koidi,” u la ong.
Ym kum kiwei pat ki Jylla, haduh mynta ka Meghalaya kam pat don satia la ka jong ka Central Jail.
Ïa mynta, ka Jylla ka don san tylli ki District Jail, kata, ha Shillong, Williamnagar, Jowai, Tura bad Nongpoh kiba lah ban ngiam 595 ngut ki shynrang bad 55 ngut ki kynthei.
