Nongpoh, K’lyngkot 30: Ki nongïalam ka HYC Ri Bhoi District mynta ka sngi ki la beh krad ia kiba bun ki samla kynthei bad shynrang kiba la pynlong kum ka jaka dih kyiad bad dih kynja ha ka surok Killing hajan ka skulbah USTM ha Ri Bhoi District.
Ki nongïalam ka HYC Ri Bhoi District ha ka jingïalam u Samla Tonny Shylla kum i General Secretary ryngkat ki dkhot ki la leit ban jurip ïa katei ka jaka, ka dei hadien ba ki la ïoh ka jingujor na ki paidbah ba ki samla pule na USTM kynthei bad shynrang ki ju leit ban pynlong kum ka jaka dih kyiad bad ka jaka dih sikret ha katei ka surok kaba don hajan ka skulbah USTM ha Ri Bhoi District.
Ha kane ka jingleit jurip, ka seng ka la lap shisha ba ki samla kynthei bad shynrang ki wan ha katei ka jaka ban pynlong kum ka jaka dih kyiad, ha kaba ha kane ka sngi ki la beh krad ïa kitei ki samla ryngkat ki jingmaham ba kim bit ban pynlong ïa katei ka jaka kum ka jaka dih kyiad bad dih sikret kaba ktah ïa ka akor ka burom khamtam ha katei ka jaka ka don ka skulbah USTM.
Haba kren sha ki Nongthoh Khubor, u General Secretary ka HYC Ri. Boi, u Samla Tonny Shylla, u la ong ba kum ka seng kam lah ban pdiang ïa ki jingleh khlemakor kitei ki samla ban pyni paidbah da kaba ïa dih kyiad bad dih sikret bad ym lah ruh ban tip ïoh ka dei ka jaka dih drok kaba ktah ïa ka imlang ka sahlang.
U la ong ruh ka seng ka leh ïa kane ka kam ban leit jurip ïa katei ka jaka, ka dei ruh ba bun ki nongshong shnong katei ka thaiñ ki la ju ud juh nam ïa kine ki kam khlemakor kitei ki samla bad dei namar kane ka daw ka seng ka jurip ban khanglad ïa kum kitei ki kam kiba ktah ïa ka akor ka burom bad ruh ka long ka nuksa ba sniew ïa ki heprit ha ka imlang ka sahlang.
Ban khanglad ïa kum kine ki kam sniew ha ka imlang ka sahlang, u Samla Shylla u la kyrpang ïa ki nongïalam Shnong, ki seng longkmie, ki samla bad ruh wat ki bor pulit ba ki dei ban pynlong ïa ka jingkhynra na ka por sha ka por ha katei ka jaka ba kum ka seng ruh ka kyrshan, khnang ba kum kine ki kam ba pynjah burom ïa ka imlang ka sahlang bad kaba long ka nuksa ba sniew ïa ki heprit lah ban rad dyngkhong bad ban pynduhjaid, u la bynrap shuh shuh.
