158 tylli mih ki shithi kyrshan ïa ka par maw ka Uranus Stone Product & Co. ha ka Public Hearing

Nongpoh, K’Lyngkot, 30: Ka Meghalaya State Pollution Control Board ryngkat ki bor district jong ka Ri-Bhoi mynta ka sngi kila pynlong da ka jingpynsngew paidbah ne ka public hearing hadien ka jingmih katto katne ki jingpyrshah halor ka jingpan jingbit biang jong ka kompani Uranus Stone Product and Co ban tih maw bad pynmih ïaki maw boulder kaba don haka shnong Umduba Ri-Bhoi District naka bynta ban ioh ïaka Environmental Clearance.
Ha katei ka jingpynsngew paidbah ban sngap ïaka sur u paidbah la wan ban donlang da u Bah S Syiem Engineer ka MSPCB, ka kong B Ranee ADC, Erick K Dkhar BDO ka Umling C&RD Block, ki Rangbah Shnong bad ki nongshong shnong na katei ka thaiñ kila wan ban ban sngap bad pynsngew ïala ka sur la ki kwah ne em ba katei ka par maw kan ioh jingbit biang ban itih maw na katei ka jaka.
Na ka liang u Nikthil Marak bala wan ban mihkhmat kum u President All Killing Dorbar haba kren ha kane ka sngi u la ong kren shai ba kum ka Dorbar hi kam pyrshah ïaka jingwan jong katei ka kompani ban tih maw ha katei ka jaka namar ka jingdon jong katei ka par maw kala ai jingmyntoi shibun ïaki paidbah bad bun naki paidbah kiba don ban sakhi ha katei ka sngi kim pyrshah ïa ka jingbteng biang jong katei ka kompani ban tih maw ha katei ka jaka.
Ban pynsngewthuh shuh shuh ïaki paidbah ha katei ka sngi naka liang ka Uranus Stone Production and Co kala pynshai paidbah ruh halor ka rukom treikam jong ka haka jaka kaba heh kumba 49600 square meter ban sa pyndonkam ruh da ki briew bad ki mashin ban tih bad khlong maw, ha kaba kan long ruh ka lad iohkam iohjam ïaki nongshong shnong, kan pynlong ruh ka jingthung da ki dieng haki jaka ba long khyndew hadien bala dep khlong maw, ban buh ïaki jaboh shi jaka bad ruh ban shna da ka pung dohkha bad kiwei kiwei.
Hadien ba kam don kano kano ka jingpyrshah naka liang ki paidbah, ki bor pynïaid ha katei ka sngi kila pyntip ruh ba kila don kumba 158 tylli ki shithi bala phah ba kum ki paidbah kim don kano kano ka jingpyrshah ïa kane ka kompani bad ïaka kaiphod bala ioh ban lum mynta ka sngi baroh yn sa aiti pat sha ka sorkar kaba yn sa ap pat ïaka rai hadien bala dep khmih bñiah da ka sorkar.
Ha katei kajuh ka sngi naka liang ka seng HYC lyngba u Bah RC Thangkhiew Vice President ka Ri-Bhoi District u la ong ba kum ka seng ka don bad ki paidbah, namar ha ki snem bala leit kala don ruh ka jingjia ba sngewsih naka jingpynbthei maw bad lada ki paidbah ki pyrshah naka liang ka seng kan sa leit ban ïakynduh ïa u EM ka District Council, MLA bad kumjuh ruh ban ai da ka jingthoh sha u DC ka Ri-Bhoi ban peit ba ka jingwan katei ka kompani kam dei ban ktah ïaki paidbah ba bun ba lang.