Mudui ejahar u MLA barim ka Mawshynrut ïa ki san ngut ba tih dewïong be-aiñ

Nongstoiñ, K’lyngkot, 30: Ki san ngut ki rangbah kata y Rosten R.Sangma na ka shnong Riangdem, Nengnang R. Sangma na ka shnong Khallu, Wailing N Marak, Geren M Sangma, Dewing M Sangma na ka shnong Bakchung, ki la shah mudui da ka ejahar ha u bah Francis Pondit R.Sangma MLA barim ka Mawshynrut bad u bah Jorminath R. Sangma u para jong u, halor ka jingtih dewïong beaiñ jong ki, wat hadien ba National Green Tribunal ka la khang pyrshah ban tih dewïong bad ba ka Ïingbishar jong ka jylla, ka Meghalaya High court ba don burom ka la pynmih ïa ka hukum ba ym bit shuh ban bteng ïa ka jingtih dewïong.
Ha katei ka ejahar ba u bah bah Francis P.R.Sangma u la mudui sha u Superintendent of Police ka West Khasi Hills, la kynnoh ba kitei ki san ngut ki rangbah ki dang ïai bteng ban tih dewïong na ki bynta jong ka Agal Hillock, Riangdim, Milsam hills bad Bappa hill lock bad ki la pynkit ïa u dewïong ba la dep tih sha Shallang bad Jaddigittim na ka bynta ban die bad pynïaid ïew.
Nalor kata kitei ki nongmudui ki la kynnoh ruh ba kitei ki san ngut ki rangbah kiba tih dewïong beaiñ, ki la pynïeng da ki khyrdop lum khajna ha ka surok PWD na Riangdim sha Rajagolla bad katei ka jingpynïeng khyrdop lum khajna ha ka surok PWD ka dei kaba beaiñ ki la ong.
U bah Francis haba ïakren bad u nongthoh khubor, u la ong ruh ba u la ju ong ïa ki barabor ba kim dei ban bteng ïa ka jingtih dewïong, hynrei kim sngap bad ki pyneh beit.
Halor ka jingpynïeng khyrdop lum khajna ha ka surok PWD ruh, u la ong ba la ju pynsngewthuh ïa ki ba ka sorkar ka la khang pyrshah bad ka la pynduh pyndam ïa baroh ki khyrdop lum khajna ha ki surok PWD, hynrei kitei ki briew ki ïaleh pyrshah beit bad kim pynsgap satia ïano ïano ruh.
Dei halor katei ka nongrim ba ma u bad u para jong u kim ban se ban leit mudui da ka ejahar bad lada kim sngap kim ban se ban leit tied jingkhang sa ïing bishar pyrshah ïa kitei ki san ngut.