Buh thong ka sorkar ban kyntiew ïa ka pule puthi yn pynbha ïa ki ïing skul bad ki kot NCERT

Sohra, K’lyngkot 30: Ka Sohra College, kaba mynta la tip kum ka Sohra Government College mynta ka sngi, ka la ïoh ïa ka building ne ïa ka ïing kaba pura, haba u Myntri Rangbah, U Conrad Sangma, u la plie ïa ka building kaba thymmai ryngkat ruh bad ki Hostel na ka bynta ki khynnah shynrang bad ki khynnah kynthei.
Lah ban kdew hangne ba ïa ka Sohra Government College la seng ha ka snem 1982 da ki katto katne ki nong Sohra kiba sngewkhia na ka bynta ka pule puthi bad khamtam eh kiba pyrkhat na ka bynta ki samla baduk basuk kibym kotbor ban wan bteng ïa ka jingpule hadien ba la pyndep ïa ka Matrik sha ki College ha Shillong.
Hadien ba la sdang ki Klas ki la long tang ha ka por janmiet bad kiba bun hi kiba leit pule kidei tang kito kiba shu leit bteng ïa ki jingpule hadien ba ki la sangeh noh katto katne por lane kiba bun hi kidei kiba la don khun don kti tangba kiba kwah leit pule biang.
Hynrei hadien ka la nang kiew katba nang ïaid ki snem da ka jingnang bun ki nongpule. Hadien pat la pynlong noh ha ka por mynsngi bad ka College ka la khring ïa kiba bun ki samla na thaiñ Sohra. Dei tad haduh ka por ba long Myntri Rangbah u Dr. Dokupar Roy, MLA ka Shella ba la pynlong ne ithuh nih ïa ka kum ka College jong ka sorkar, kaba long ka College kaba nyngkong eh ha East Khasi Hills ka ban dei jong ka sorkar.
Hadien ba ka sorkar ka la shimti, la tei noh ïa ka building kaba thymmai bad ki nonghikai ruh ki la ïoh da ka tulop sorkar.
Ym tang ba la tei ïa ka building kaba thymmai, hynrei la tei ruh ïa ki Hostel na ka bynta ki samla pule shynrang bad kynthei.
Ha ka jingplie ïa ka building ba thymmai bad ïa ki Hostel, la ïadon lang ruh u Myntri ka thih ka pule, u Rakkam Sangma, ka Myntri jong ka koit ka khiah, ka Dr. Ampareen Lyngdoh, u Myntri ka thoh ka pule bari, u Bah Lahkmen Rymbui, uba la pynïaid shaphrang ka jingtei ïa ka College ha ka por jong u. La ïadon lang ruh u MLA jong ka Sohra bad Shella bad ki ophisar ka tnad pule puthi, ki nonghikai bad ki samla pule ka College.
Haba kren ha kane ka jingïalang, u Conrad u la ïathuh ba kumno ka sorkar ka ot khajna na ki tnad treikam bapher bapher ba la tip kum ka Educational Cess bad dei lyngba kane la pyndonkam na ka bynta ka jingpynbiang ïa ki College, ki Skul naduh ki Higher Secondary, ki Secondary haduh ki Lower Primary kiba dei jong ka sorkar.
U Conrad u la ïathuh ruh ba da ki spah tylli ki Skul la tei bad yn tei thymmai da ka sorkar ha ka jinglut ka ban poi shaduh ka 500 klur tyngka.
U kyrmen ruh ba kane ka jingïoh ka Sohra Government College kan long u mawjam ba thymmai na ka bynta ki samla pule ka Sohra hi baroh kawei.
Ha ka juh ka por u Myntri Rangbah u la ong ba ka jylla kan sdang ban treikam ia ki kot ba la pynkhreh da ka NCERTbad ka sorkar kan nang pynbha katba nang mih ki snem.