Mana ka DC ban buh lama bad banner ki party khlem ïoh jingbit

0

Shillong, K’lyngkot 03: Ka Deputy Commissioner ka East Khasi Hills ha ka sngi Ba-ar ka la pynmih ïa ka hukum ba ki seng saiñ pyrthei kim lah ban shu sieh lama, ne wah ki banner bad kiwei kiwei ki jait jynthoh khlem da ïoh jingbit shuwa na ka ophis ka DC.
Ha ka hukum la ong ki party nangne sha khmat ki dei ban da pan jingbit shuwa da ka jyntoh na ka ophis bad ba ki dei ruh ban weng mardor ïa ki lama ne kino kino ki tiar ba pynïeng kat kum ka por bad ki kyndon kiba ka ophis kan ai.
Kane ka hukum ba la pynmih ka kdew, “La sakhi ba ha kine ki sngi kiba la leit ki party kiba pynlong jingïalang ha Shillong bad ha ka District baroh kawei ki pynïeng ki signboard, ki lama, ki banner bad kiwei ki tiar kiba pynphalang ïa ka party jong ki. Hynrei wat hadien ba ki la dep pynlong ïa ka prokram kim weng satia bad kane ka la wanrah ïa ka jingthut ïa u paidbah bad kaba lah ruh ban buh jingmang ïa u namar kim shym la pan jingbit na ki bor ba dei peit la ka jaka ba ki pynïeng ka long ne em kaba shngaiñ ïa ki paidbah ba leit ba wan”
Shuh shuh la ong ba ki don ruh ki seng saiñ pyrthei kiba la pynïeng ïa kine ki lama bad ki jynthoh ha ki ophis sorkar bad kane ka long kaba pynkheiñ ïa ki kyndon ka Election Commission of India.

Leave A Reply

Your email address will not be published.