Shillong, K’lyngkot, 03 Ha kawei na ki jingjia kaba sngewsih, uwei u heprit na ka shnong Mairang Mission, Eastern West Khasi Hills District u la duhei ïa la ka jingim hadien ba ka trok kaba don ïa u nombar ML-04 D 1408 ka la iuh ïa u katba u dang jam kynsan sha shiliang jong ka surokbah National Highway-44E ha ka por ba u dang leit thied jingbam bad la u kpa.
U Kyrwoh ba la phah da u Superintendent of Police (City) ka East Khasi Hills District u Bah Vivek Syiem, u la ïathuh ba kane ka la jia ha ka por kumba 10:30 baje mynstep ha ka Sngi Baar ha ka shnong Umsohiong kaba hap hapoh ka Mawngap Police Station.
La ong ba ki kmie ki kpa jong une u heprit ki la mih na Mairang ban leit sha ka shnong Marbisu da ka kali lajong bad ynda la poi ha ka shnong Umsohiong, u kpa jong une u heprit, u Bah Wanjingshai Sun u la bthah ïa u nongniah ban pynsangeh ïa ka kali harud lynti na ka bynta ban thied chips ïa la u khun. Hynrei katba u dang ïalam ïa la u khun ban leit thied jingbam, kane ka trok ka la wan mih kynsan bad tang shu ïohi ïa une u heprit ba u la jam sha shiliang jong ka surok, u nongniah jong ka trok u la pyrshang ban kiar katba lah hynrei namar ka jingbym lah ban tehlakam shuh ïa ka brake, ka trok ka la iuh throit ïa une u heprit bad tynrah ruh ïa ka kali maruti ba la shong da une u heprit kaba dang pynieng harud surok.
Marmar la pynkit ïa une u heprit sha Sohiong CHC bad hadien kane la pynkynriah noh ïa u sha Nazareth Hospital, Shilllong ha kaba ki doktor ki la pynbna ba u la khladnoh.
Ki Pulit ki la kem noh ïa u nongniah jong ka trok bad register case halor kane ka jingjia.
