Shillong, K’Lyngkot 03 : U kyrtong ka UDP na Mawkynrew, Bah Remington Pyngrope ha ka sngi Ba-ar u la ong ba lada ka UDP ka ïoh ban jop bun ha kane ka elekshon MLA la tikna lypa ba u Myntri Rangbah un dei noh da u Khasi.
Ïa kane u Bah Reming u la kren ha ka jingïalang pdiang burom ïa ki nongïalam na ki party bapher bapher kynthup ki nongïalam na ka party HSPDP, NPP bad ruh na ka PDF ha ka jingïalang kaba long ha Jatah.
“Ha ka UDP ym don satia uwei ruh u MLA uban mih bad leit ïakhun noh na kawei ka party kumba long ha kiwei ki party. Mynta ruh shen ki don bun ngut ki MLA na kiwei ki party kiban sa wan ban ïakhun noh na ka party jongngi. Kane hi kan pyntikna ba lada ngi jop bun ki MLA hapoh ka jingïalam jong u Bah Metbah Lyngdoh ngin sa ïoh noh u Myntri Rangbah da u Khasi,” la bynrap shuh shuhu Bah Reming.
Da kaba pdiang burom ïa kitei ki riewrangbah kiba wan na ki party bapher bapher ryngkat ka jingsakhi ki nongkitkam jong ka party kiba dei na ka area Jatah, u Bah Reming u la ong ruh ba ka jingshah rem noh jong u ha ka elekshon 2018 kadei tang namar u leit ïakhun noh na ka tiket NPP.
Shwa kane, u la ïathuh ruh ba ka daw kaba u iehnoh ïa ka UDP kaba la pynjop haduh arsien ïa u kum u MLA kadei namar ha kato ka por ki kwah ban ïoh Myntri Rangbah noh da u Khasi hynrei ha katei ka kynti u shah rem pynban ïalade.
Ha kane ka sngi, u Bah Reming u la pynpaw ruh ïa ka jingkyndit ban ïohi ba mih ki jingkular sam sboh dawai nongrep, nangta ka skim 5000 tyngka bad kiwei mynta ba la jan elekshon katba ha ki saw snem mynshwa pat ki kynjah jar jar.
“Ha ki 10snem kum u MLA nga la trei jar jar bad nga la lah ban wanrah bun ki surok, ka umbam umdih, ki jaka sumar, ki jaka pule bad kiwei kiwei ki kam pynroi kata ruh kum u MLA ba shong ha liang pyrshah. Hynrei ka jingrem noh jongnga imat kadei ba nga leit ban ïakhun na ka NPP,” u la bynrap biang.
Ha kane ka sngi ki nongïalam kiba wan na ki party bapher ki la ong ba ka jingwan jong ki ban kyrshan noh ïa u Bah Reming kadei namar ki ïohi ba dei tang ka UDP kaba don ka jingkyrmen ban ïoh ïalam ïa ka sorkar ha kane ka kynti kaba mynta.
