Man ba ther u lapbah, shlei um ka thaiñ Jorabat, shah ktah jur ki paidbah bad ka leit ka wan

Nongpoh, Jymmang 11: Ki paidbah jong ka thaiñ Jorabat man ka por ki hap ban mad ïa ka jingeh kaba khraw namar ka jingshlei um kaba ju jia tang shu ther u slap, watla ki bor ba dei peit na ka jylla Assam ki la pyrshang ban pynkhuid ïa ki nala bad ka jaka tuid um man ka por, hynrei katei ka jingeh ka dang bteng beit haduh kine ki sngi.
Mynta ka step, tang hadien ka jingther jong u lapbah kaba la neh katto katne por, ki bynta jong u surok ha Jorabat ki la kylla kum ki wah bah, kaba la pynlong ïaki paidbah ban mad jingeh naduh ki dukan haduh ki kali ba leit ba wan namar ka jingheh ka umsaw.
Ka jingshlei um ka la wanrah ruh ïa ka jingdheng kali kaba jur ha katei ka surokbah, ha kaba bun ki kali kim lah shuh ban ïaid paidbah namar ka jingjylliew jong ka um bad hap ban sangeh da ki kynta tang ban ap haduh ba ka um kan duna. Kane ka jinglong jingman ka la pynwit ïa kiba bun ki nongleit nongwan bad khamtam ïa ki paidbah kiba hap ban leit trei ne pyndep ïa ki kam ba man ka sngi.
Katkum ka jingïathuh jong ki paidbah shnong, katei ka jingeh ka dei kaba ju jia man la ka snem haba sdang ka aiom slap. Ki paidbah ki la pynpaw ruh ba watla la ju don ki jingpyrshang ban pynkhuid ïa ki nala bad ki jingïaid um, hynrei ym pat lah satia ban weng ïaka jingeh.