800 klur tyngka na ka UCF Scheme ïoh ka Meghalaya ban pynbha briew ïa ki nongbah sor

Shillong, Jymmang 11 : Ka Sorkar Meghalaya ka la pynkhreh ïa ka detailed project report jong ki project ba kot haduh 800 klur tyngka na ka Urban Challenge Fund (UCF) Scheme ba thymmai ka Sorkar Pdeng, kaba pynleit jingmut ha ki kam ban pynbha briew ia ki nongbah sor da kaba pynbha naduh ki na la, ka jingpynitynnad ïa ka sor bad ki jingtei ba kongsan jong ki jaka sor.
ïa kane la pyntip da u Symbud Myntri Rangbah ba khmih ïa ki kam Pynroi Sor u Ma Sniawbhalang Dhar da kaba ïathuh ba dang shen u Myntri ka Sorkar Pdeng ba khmih ïa ki kam Pynroi Sor ula lum ïa ka jingïalang ban ïakren ïa kane ka skhim ha New Delhi.
“Ka dei ka jingïalang kaba kongsan bha kaba ïadei bad kane ka skhim thymmai bala pynlait da ka Sorkar India ba la ai kyrteng ka Urban Challenge Fund Scheme” ong u Ma Sniawbha.
“Nga kmen ban pyntip sha phi ba ngi la ïoh ïa ka song tyngka ba bun bha kaba kot da ki spah klur na kane ka skhim. Ngin sa pynkhreh mynta ban shna ïa ka detailed project report kaba ym duna ïa ka 800 klur tyngka” ula bynrap.
Haba buh thong ïa ki kam kiba kongsan, u Ma Sniawbha ula ong “Ki don katto katne ki project na ka bynta ban pynroi ïa ki jaka sor, khamtam eh ki jingtei. Ngi la tyrwa ban trei pynbha ïa ki jingtei ba donkam jong ki jaka sor bad ka jingpynitynnad ïa ka sor”.
“Hapoh ki kyndon treikam, ngi lah ban aiti ïa ki skhim ba ïadei bad ka jingshna pynbha ïa ki nala bad kiwei ki jingtei kiba donkam jong ka sor” ula ong.
U Ma Sniawbha u pyntip ruh “Ka Integrated Command and Control Centre na ka bynta ka jingshngaiñ ka sor baroh kawei, ka don halor eh na ki thup ba la kyrpad, hynrei ngi la dep don ïa kawei, bad kumta kane kam don shuh ha ka jingïapyrkhat. Ka jingpynleit jingmut ka long eh ha ka jingshna ïa ki nala bad pynbiang ïa ki jingdonkam ka sor. Ka jingthmu hi ka long beit thik tang ïa ka jingpynroi ïa ki sor”.
Halor ka jingdawa ki sengbhalang ban buh ia ka Cultural Centre ha Khyndailad, u Ma Sniawbha ula ong ba ka Sorkar kan ïaid kat kum ka jingkwah u paidbah. “Balei ba ki Sengbhalang kin hap ban dawa? Ngi hap ban trei kat kum ka mon jong u paidbah” ula ong.
“Ka Sorkar ka shai bha ; ngi leh beit ïa ki kam halor ka jingkyrpad jong ki paidbah ka Jylla. Kane ka dei ka nongrim treikam jong ngi” ula ong bad bynrap “Hateng hateng ngi shim ïa ki rai, bad hateng hateng ngi weng noh ïa ki na ka bynta ka bha ka miat u paidbah”.
U ïathuh ba na ka bynta ka Khyndailad, ka Tnad kala dep pynkhreh ïa ka DPR ban pyntreikam ïa ki project ba pynitynnad ïïa ka jaka.