Leit kynduh DC ka JNC bad kiwei de ki seng ba lum khajna ka Toll Gate ïa ki kali ML-04 bad ML-11

Jowai, Jymmang 11: Ka Jaiñtia National Council (JNC) Western Zone ha ryngkat ka PSM, HYC bad ka seng ki nongñiah kali kamai mynta ka sngi 11 tarik u Jymmang kila leit ban ïakynduh ïa u Deputy Commissioner ka West Jaiñtia Hills, u Abhinav Kumar Singh halor ka jingsdang lum khajna ka Toll Gate ha Ialong-Pasyih ïaki kali ML 04 bad ML 11.
Na ka liang u Deputy Commissioner ka West Jaiñtia Hills haka 17 tarik u Lber ula pynmih ïa ka hukum ban lum khajna ïa baroh ki kali lait noh tang ïaki kali kiba naka Shnong Ialong, Pasyih, Phramer, Sabah Muswang, Muthlong, Mookaswan, Nangbah bad Mihmyntdu.
Na ka liang u samla Hamehi Bamon uba dei ruh u President ka JNC – Western Region hadien ka jingïakren bad u DC ula pynsngew ba katei ka Toll Gate ba pynïaid da ki bar jylla kala lehbeiñ shaba palat ïa ka hok longtrai jong ki khun ka Ri-lum Jaiñtia da kaba lum khajna naphang ïa ki kali.
Ka seng haba kylli na kaei ka daw ba u DC ula pynmih ïa katei ka hukum la ïathuh ba u DC ula ïoh jingbit naki katto katne ngut ki Waheh Shnong bad na kiwei de ki seng bad kane kala pynsngewsih jur ïa ka seng halor ka jingdon ki briew kiba shukor ïala ki jong ki paidbah trai jylla, la ong utei u President.
Halor kane ka jingleh ki Waheh Shnong ula ong ka lah ban don kaei kaei kaba sha lyndet, da kaba bynrap ba ka seng hapoh ka shatri jong ka JAC ula pyntip hapoh kane hi ka taïew kin shong ka jingïalang ban pyrkhat ïa ka bha ka miat jong ki paidbah.
Katba u General Secretary ka PSM, u Wompher Wann ula pynpaw ka jingsngew kyndit namar tang uwei u President ka seng ki kalai kamai ka All Jaiñtia Commercial Vehicle Association (AJCVA) uba tip ïa kane ka hukum bala pynbna ha ka 17 tarik u Lber.
Shuh shuh ula ong ka jingbuh ïa ki Toll Gate ka dei ban don haka jingjngai kaba 60 km na kawei pat hynrei ka Toll Gate kaba don ha ïalong-Pasyih bad ha Lumshnong ka jngai tang kumba 54-55 km.