Ap ka Meghalaya ïa ka sorkar Assam ban thaw Border Committee thymmai ban sdang biang ka jingïakren pynbeit pud

Shillong, Jymmang 11 : Ka Meghalaya Regional Committee ka West Jaintia Hills sector, kan bteng biang ïa ka jingïakren pynbeit pud tang hadien ka jingthaw Sorkar thymmai ha Assam bad thung thymmai ruh ïa u Chairman ka Regional Committee katei Jylla, ong u Symbud Myntri Rangbah u Ma Sniawbhalang Dhar.
‘Ai ba ka Sorkar Assam kan thaw shuwa ïa ka Sorkar bad ngin sa phah sha ngi ïa ki kyrteng ba mano ki ban long ki Chairman ba thymmai jong ki Regional Committee” ong u ma Sniawbha uba long u Chairman ka West Jaintia Hills Regional Committee.
U Ma Sniawbha ula pyntip ba ka Sorkar Meghalaya ka la dep ban pynkhreh ïa ka kaiphod halor ka Block-I, kaba dei kawei na ki jaka ïakajia ba dang sahteng ban pynbeit, hynrei ïa kane ka kaiphod ym pat shym la aiti satia.
“Ka kaiphod ka dang don bad ki bor synshar district bad yn dang aiti ïa ka namar ngi la bthah ïa ki ba kin buh shuwa kumba ka long” ula ong.
U Ma Sniawbha ula ong “Lehse haba kut jong une u bnai, Ngan sa bthah ïa ki ba kin aiti ïa ka kaiphod sha ka Sorkar Jylla bad ngin sa leh ïa kaba donkam hadien ba ka Assam ka la thung ïa ki Chairman ba thymmai na ka liang jong ka”.
Haba kylli halor ka jingleit jurip lang ïa ki Shnong ba hap hapoh Block-I, u Dy CM ula ong ba ïa ka sngi yn sa ïashim rai lang da baroh arliang. “Ngin sa ïapeit bad ïakren ïa kane ka kam bad baroh artylli ki Sorkar” ong u Ma Sniawbha.
Haba kylli, ula ïathuh ba ka jingïakynad ha ka thaiñ Khanduli-Lapangap ka la kham jai jai mynta hadien ka jingïalang jong ki bor district.
“Tang mar syn dep ka elekshon bad la pynbna ïa ka result, bad wat ha kine ki arsngi-laisngi ba la leit, ha ka 5 tarik Jymmang, ka la don ka jingïalang hapdeng u Deputy Commissioner ka West Jaintia Hills bad Deputy Commissioner ka Karbi Anglong District ha ka jingïadonlang ki Nongïalam Shnong ka Khamduli bad Lapangap” ula ong.
“Ki la ïabeit ïa mynta shipor bad ka jinglong jingman hi ka la jai jai” ula bynrap.