Maham ka seng RBTEDF ïa ki briew ba thang dusmon ïa ki khlaw bad pynïap ïa ki mrad bad doh um

Nongpoh, Ïaiong 02: Ka seng Ri-Bhoi Tourism and Environmental Development Forum ka wei naki seng trei mon sngewbha naka bynta ban pynneh pynsah ïaka sawdong saw kun jong ka mei mariang kiba kynthup na duh ki khlaw ki btap, ki lum ki wah bad ki mrad mareng ka khot bad wer ïaki paid nong shong shnong ha poh ka thaiñ, ba kin kiar na kaba thang dusmon ïa ki khlaw ki btap, namar kane ka wan rah ïaka jing jia ba sngew sih ïaki long iing long sem, ki shnong ki thaw bad ka jing duh jait jong ki jing thung jing tep bad ki mrad ki mreng.
U Bah Plielad Tiewsoh kum u Chairman haba phah ïaka kyrwoh u la ong ba nakaliang ka seng ka maham ruh ïaki to ki riew shim kabu kiba pyrkhat tang ïaka malade, kiba jumlien ban pynïap pathar ïaki doh um, doh wah da ka ba ber da ki dawai bih ne siat bom, ban pynjot pathar (dusmon) ïaki jingthaw ba don ha um, ki ba la sdang ban duh jait ha kine ki sngi, ba ka seng ka ju pynsngew ban ri bad sumar ha duh mynta, ka seng ka maham ïaki briew kiba ïa leh pyrshah, lada lap ka seng kan kem bad phah beit sha ka bor jong ka aiñ.
Ka seng ka don ka jing sngew khia, haba ngi peit ha kine ki sngi, bun ki shnong ki thaw ki don ha pdeng ka jing kyrduh um haki ne ki sngi, namar ki tyllong um kiba ju pynmih umbam umdih ki la sdang ban rngad lut, namar ka jingpynjot pathar ïaki khlaw ki btap kiba don haki rud wah ne tyllong um.
Namarkata naka liang ka seng ka khot bad wer ïa kiwei kiwei ruh ki seng trei mon sngew bha, ki seng samla shnong, ki dorbar shnong , ba kin ai ka jingïatreilang bad ka seng, khnang ba kum ka seng kan lah ban pynneh pynsah ïaka jing itynnad jongka mei mariang kiba u Blei u la ai ïa ngi bad ki jingthaw ba im baroh kiba don haka.