Ai jinghikai halor ka jingdonkam thikna ka bording electrik ban kyntiew ïa ka ioh ka kot ki paidbah ha ka ri
Nongpoh, Ïaiong 02: Kum shi bynta jong ka thong ka Azadi Ka Amrit Mohotsav ban rakhe ïa ka jingdap 75 snem ka ri India ba la ioh ïa kata ka jingsynshar laitluid na ki jingsynshar donbor ha kiwei ki ri, ka REC Limited, ka Maharatna Company lyngba ka Ministry ka tnad Power jong ka sorkar India ka la pynlong ïa la porkram ba la tip kum ka ‘Bijli Utsav’ ha Ri Bhoi na ka bynta ban pynshai ïa ka thong jong katei ka prokram ba la wan rah da ka sorkar India.
Ïa kane ka prokram la pynlong ha ka Shnong Mawsmai ha kaba la wan ban shim bynta naduh u bah T. Marwein, EAC ka Ri Bhoi, u Bah R. Kharwanlang, EE&Nodal Officer ka tnad MeECL bad kynthup ruh ki nongmihkhmat na ka REC Limited, Regional office Guwahati.
Ha kane ka prokram nalor ki paidbah nongshong shnong la don ryngkat ruh u Rangbah Shnong ka Mawsmai, u Bah Petrus Shakwa bad u Secretary, u Bah Anil Doloi.
Haba pynshai halor ka jingthmu ka Bijli Utsav, ki nongmihkhmat na ka tnad MeECL bad na ka REC Limited Company, ki la pynshai halor ki mat treikam ba kane ka Company bad wat ka sorkar India ka ban khia ban kyntiew ïa ka kam pynmih bording electric bad kumjuh ruh ban beit tyngka na ka bynta ban pynmih bun ki bor ding electric.
La pynshai paidbah ruh bai a ka REC Limied Company la seng naduh u snem 1969, ba ka la ïaid lynti mynta la 50 snem tam ei ei bad shibun ki kam ka la leh na ka bynta ban kyntiew ïa ki kam ban pynmih ïa ka bording electric.
La pynshai shuh shuh, ba ka REC Limited Company ka ai jingïarap ïa ka State Electric Board, ka sorkar jylla bad ka sorkar kmie na ka bynta ban pynmih ïa ki jaka tan bording electric bad kumjuh ruh ban pynpoi bording sha ki shnong nongkyndong.
Shuh shuh, lyngba jong kane ka sngi la ai jingkren ruh da kitei ki ophisar halor ka Consumer right, ka hok jong ki nongthied nongpet bad kumjuh ruh ka hok ban ioh tan bording electric khamtam ha ki shnong nongkyndong ba lyngba ka jingioh ïa ka bording ba thikna ka kyntiew ruh ïa ka ioh ka kot jong ki paidbah nongshong shnong.
La pynkut ïa kane ka sngi da ka jingsam ïa ki khusnam sha ki nongjop ha ki jingshad tynrai bapher bapher bad la sam ruh ïa ki LED Bulb sha ki nongioh jingmyntoi lyngba ka skhim Saubhagya.