Shillong, Naiwieng 14 : Ki thei ïalehkai phutbol ka Jylla ki la mad biang ïa ka nam rem ha ka sien kaba ar hynne ka sngi hadien ba ki la shah rem da 2-0 kol ha ka Gujarat ha ka lympung ïalehkai jong ka Senior Women’s National Football Championship kaba long ha Sundargarh, Odisha.
Lah ban kdew hangne, ka kynhun ïalehkai na Meghalaya ka la shah rem da 3-1 kol ha ka jingïakhun kaba nyngkong pyrshah ïa ka Odisha kaba long ha kane ka sngi U Blei.
Haba phai sha ka jingïakhun, ka Gujarat tang ha ka minit kaba saw jong ka kylla step ka la ïoh ban thep ïa ka kol kaba nyngkong lyngba ka Anjanaben Thakor katba ïa ka kol kaba ar pat la ïoh ban thep da ka Shilpaben Devabhai Thakor ha ka minit kaba 33.
Ka Meghalaya watla ka ïakhun tyngeh ruh kam shym la lah satia ban pynphai wat tang shi kol ruh tad haduh ban da kut ka por ïalehkai.
Mynta, ka Jylla ka hap ban pynkhreh bha na ka bynta ka jingïakhun kaba bud kaban long pyrshah ïa ka Arunachal Pradesh ha kane ka sngi Palei.
Ki thei ïalehkai jong ka jylla hynne ka sngi ki kynthup ïa ka Banrisha Wahlang (ap kol), Baïarkynti Mylliemngap (bujli hadien da ka Fuldamary Umsong ha minit ba 90’+1), Aibaplielad Skhemiew, Badarisha Kharumnuid, Danishisha Lyngdoh, Sunalinda Ïawren, Saviinity Jyndiang, Makrisha Songthiang, Ideibanrishisha Kharpan ( mih bujli da ka Da-ai-jingsuk Basawïamoit ha minit ba 33), Marbarin Nongrum, Saralin Warlarpih (mih bujli da ka Charlinda Nongtdu ha minit ba 33).
