Lymda ka KSU ka pynshitom ïa kiba shoh ia u Charming ka pyni ba ka la long ka kynhun kaikhlaw; ong kiba ha ïing

Shilong, Rymphang 02: Ka Hymmen u Bah Charming Marngar ka la kam ba ka la sakhi da lade ïa ka jingshah ktah kti bad shah shoh sha bom jong u ha ka ophis treikam jong ka Khasi Students’ Union (KSU) ha Jaïaw ha ka 30 tarik Kyllalyngkot ha ki briew kiba la kah durkhmat ïalade.
Haba kren sha ki lad pathai khubor kiba ha ïing ki la ïathuh ba na ka liang jong ki ki la dep ruh ban mudui ruh da ka ejahar sha ki Pulit jong ka Lumdiengjri Police Station pyrshah ïa kito ki briew bad na ka liang jong ki ruh ki la dawa ba u President ka seng u Bah Lambokstarwell Marngar bad ïa ka seng hi ba kan shim ïa ki sienjam kiba tyngeh ïa kine ki dkhot kiba ktah kti ïa u ba ha ïing jong ki.
Ki la ong ruh ba lada ka seng bad ki nongïalam jong ka kim shim ïa kano kano ka sienjam pyrshah ïa kine ki dkhot kiba shoh ïa u Bah Charming ka pyni shai ba kam dei shuh ka seng ne ka kynhun ki samla pule hynrei ka la dei pynban ka kynhun jong ki kaikhlaw.
“Ngi sngew dei ba u Bah Lambokstarwell u dei ban hiar shuki noh lada dei ba um tip eiei ïa kane ka jingleh ki dkhot jong u bad lada um hiar shuki ngi sngew dei ban ong ba kam dei shuh ka kynhun ki samla pule hynrei ka la kylla long ka kynhun ki kaikhlaw,” ong u kñi jong u Bah Charming.
Ka hymmen ka la kynnoh ba dei ha ka ruh ba ha kane ka jingshah thombor, ka pisa kaba u Bah Charming u rah 40 hajar bad ar tylli ki sati ksiar kiba khia shi tula ki la jah rngai na ka met jong u bad ha kajuh ka por ka ing ka sem jong u Bah Charming ka la dawa ïa ki bor pulit ba ki dei ban pynlong ïa ka jingtohkit kaba bniah bad ong ruh ba wat ma ka ruh ka la sakhi da la ki jong ki khmat ïa kane ka jingshah thombor jong u para u jong ka ha ka por ba ka leit wad hi dalade ïa u Bah Charming ha ka ophis jong ka KSU kaba don ha Jaïaw.
Ka la ïathuh ruh ba kane ka jingjia ka la sdang shuwa ha ka 20 tarik ha kaba ka la don ka jingshah dawa pisa u na u Charming ha Umshyrpi ha kaba ka la don ruh ka jingïashoh ba markylliang.
“Ka jingleit sha ophis ka KSU ha ka 30 tarik ruh ka dei da ka jingmut ban ïakren pynbeit ïa kaei kaba la jia ha ka 20 tarik bad ka jingleit mih ruh ka dei hadien ba ngi la dep ban ïakren lyngba ka phone bad u President ka seng ha kaba u la bthah ba u para jong nga un wan mih,” ka la ong.
Ka la bynrap, “Dei ynda nga la phone ban kylli aiu ka mih na ka jingïakren kaba u para jong nga u la leit sha ophis ka KSU hynrei u para jong nga u la ïathuh ba u la shah shoh shah bom pynban ha kaba nga la leit bran bran bad nga la lap da lade ïa kaei kaba la jia.”