Shillong, Rymphang 2 : Katba ka sngi ban jied ïa ki nongmihkhmat sha ka ïingdorbar thawaiñ ka la jan, ka kam saiñ hima sima ha ka jylla ka la nangïaid ha ka jingpynkhreh ka jong ki na ka bynta ki nongmihkhmat na ki party ki bapher bapher, bad katba ka jingïatan tyllai ki party ban jop ha ka election ka la nang ïaid na kawei ka sngi sha kawei ka sngi, ka NPP kaba lamkhmat ia ka sorkar, ka la kob ba kan sa jop biang ha kane ka election bad kan long ka jingjop kaba heh, bad ha kajuh ka por, ka AITC ruh ka la kob ba kan sa jop bun ha kane ka election kaban sa wan.
Haba ïakren bad ki lad pathai khubor mynta ka sngi ha ophis treikam jong ka NPP, u nongaiktien jong ka NPP uba dei u Secretary ka NPYF bad NPP u bah Bajop Pyngrope u la ong ba ka NPP ka don ka jingthrang ban pynneh pynsah bad ai jingithuh ïa ki kolshor ki riti ki dustur jong ki jaidbynriew riewlum ha kane ka jylla ym kum ka AITC kaba kwah ban pynduh pyndam bad ibeiñ ia ka kolshor bad riti dustur tynrai ki trai ri trai muluk ka jylla Meghalaya.
U la pynkynmaw ïa ki kam kiba ka AITC ka la leh ha ka por ba don ka jingjied thymmai ïa ka President bathymmai jong ka Ri ha kaba ka TMC ka la ai jingkyrshan ïa u Yaswanth Sinha, watla ki la ka tip lypa ba ka Droupadi Murmu kan long ka President banyngkong eh na kawei pat ka jaitbynriew riewlum. U la pynkynmaw ruh ba u myntri ka TMC na West Bengal, u Akhil Giri u la kren pyrshah ïa ka longrynieng jong ka President jong ka Ri India bad u nongïalam ka TMC, u Kirti Azad u la kren pyrshah ïa ka kolshor bad ka riam ka beit jong u khasi haba u ïohi ba u Mytnri Rangbah ka ri u Narendra Modi u riam Khasi haba u wan sha ka jylla.
Haba kren ha kane ka sngi, u nongaiktien ka NPP, u la ong ba ka AITC ka don ïa ka jingisih bad peitpoh ïa ki riewlum, bad hapdeng ka election, ka AITC ka shu kular meinah ïa ki paidbah bad ka shu pynbiej ïa ki riewlum da ki jingkular ki bym dei.Shuh shuh u la kdew ba dang shen ka AITC ka la kular ban pynrung ïa ka ktien Khasi bad Garo ha ka khyrnit kaba 8 jong ka Indian Constitution, hynrei ki leh aiu ha ka por ba ki synshar 8 snem ha ka lama jong ka Congress.“Ula ong ba ki paidbah ka jylla Meghalaya ki long kiba stad ban tip ba ka jingkular ban pynrung ïa ka ktien khasi bad Garo ka long ka jingkular ba tang da ka ktien khlem da don kano kano ka jingthmu bad leh da ka kam.
