Ba kren kham jam ki kam u bah Prestone ban ïa ka ktien, pynïasoh NPP ka Kong Banalari
Shillong, K’lyngkot, 02: Ka Kong Banalari Khongwar kaba long ka nongïalam barim jong ka United Democratic Party (UDP) ha ka sngi Palei ka la pynïasoh bad ka National Peoples Party (NPP) na ka bynta ban ai jingkyrshan ïa u Bah Prestone Tynsong uba ïakhun ïa ka elekshon MLA na Pynursla Constituency ha ka wat kaba san.
Ïa ka Kong Banalari bad ïa ki nongkyrshan jong ka, la pdiang sngewbha da u Bah Prestone Tynsong ha ka jingïalang kaba la long ha ophis treikam jong ka NPP ha nongbah Shillong.
Haba kren ha ka jingïalang, ka Kong Banalari ka la ïathuh ba ka la ïakhun arsien ïa ka elekshon MLA ha u snem 2008 bad 2013 pyrshah ïa u Bah Prestone hynrei ha u snem 2022 ka la mih noh na ka UDP ban pynleit jingmut noh ha ki kam shimet ki jong ka.
“Haba nga la mih noh na ka UDP, ki paralok, ki nongïalam bad ki nongkyrshan ki jong nga kiba la kyntu ïa nga ban pynïasoh noh bad ka NPP, kumta haba nga ïohi ïa ka jingtrei jong I Bah Prestone ban wanrah ïa ka roi ka par bad kyntiew ia ka Pynursla Constituency nga la ihun bad rai ban pdiang ïa kane ka jingtyrwa jong ki nongïalam bad nongkyrshan jong nga ban don noh bad ka NPP”. ong ka Kong Banalari.
“Ha ka por ba u (L) Dr Donkupar Roy u dang long u President jong ka UDP, ngi ki nongtrei jong ka seng ha Pynursla, ngi ïa ieid bad ïa sngewtynnad haduh katta katta hynrei haba im shym la don shuh bad la wan noh da kiwei kiba thymmai ki nongkitkam jong ka seng kumta na ka daw shimet nga la mih noh naka seng UDP ha u snem baladep,” ong ka Kong Banalari.
Ka la ong haba ka peit ïa ka jingtreikam u Bah Prestone ba u la leh bha ïa ka thaiñ ha baroh ki liang ka la noh mynsiem ban ai jingkyrshan noh ïa u Bah Prestone ba un dang jop ïa ka elekshon ha kane ka kynti.
U Bah Prestone haba pdiang sngewbha ïa I Kong Banalari u la ong ba ka jingpynïasoh kan nang ai mynsiem ïa u bad ïa ki nongkyrshan jongu khamtam ba i Kong Banalari i la trei bor bah bad leit man la ki shnong ba pan ka jingkyrshan na ka bynta ubah Prestone bad u la ong ruh ba haba la pynïasoh ka mut naduh mynta la long shi ïing shisem bad yn ïatrei lang da kawei ka thong ban ïoh ïa ka jingjop don burom. La pynbna ruh ba i kong Banalari in long kum ka Vice President jongka Tnad ki Seng Longkmie ka NPP.