Pynkup burom u bah Alan West Kharkongor ia ki samla bad Rangbah Die Shana na Thain Laitlyngkot

Shillong Rymphang 2 : U Candidate jong ka seng NPP na Sohra Constituency, u bah Alan West Kharkongor mynta ka sngi u la pynkup burom ïa kumba 24 ngut ki samla khasi kiba die bad tyrwa shana sha ki shnong bapher bapher kiba dei na ka thaiñ Laitlyngkot bad Nongkynrih ha ka Jingïalang paidbah jong katei ka party kaba la long ha Madan Sylli Sning ha Lailtyngkot mynta ka sngi.
Ha kane ka sngi la sam ïa ka Certificate of Acknowledgement sha kitei ki 24 ngut kum ka dak jong ka burom ïa ka jingtrei shitom jong ki bad ruh ba ki long ki nuksa kiba radbah ha ka jaitbynriew kiba pynpaw shai ba lada don ka mon, ka kam kam kyrduh ha kane ka ri Khasi Jaintia jongngi. ïa kitei ki Certificate la sam da u Symbud Myntri Rangbah jong ka jylla, u bah Prestone Tynsong uba long ruh u National Vice President jong ka National Peoples Party (NPP)
Katei ka jingleh jong utei u kyrtong ka NPP na Sohra ka pynpaw shai kdar jong u ba lada u paidbah u jied ïa u kum u MLA ha kane ka kynti, ka phang treikam jong u ka long ban pynkharoi ïa ki lad ïohkam ïohjam bapher bapher ha ka consttitieny khamtam eh da kaba pynshlur bad ïarap ïa ki khun samla ban seng ïa ki kam ki jam lajong.
“Lada phi pynjop ïanga, ka kam kan ym kut tang ha ki sam schme MLA hynrei ngan trei ban kyntiew ïa ka ïoh ka kot jong ka constituency da kaba pynkharoi ïa ki lad ïohkam ïohjam” ong u bah Alan. U la kyntu ïa ki khun samla ban ym shaniah lane phai khmat than sha ka kam sorkar hynrei ka juk ka la poi mynta ban ïeng ha la ki jong ki kjat da kaba seng ïa ki kam ki jam lajong. “ Ka nuksa kaba bha eh kaba kitei ki samla die shana ki ai ka dei ba lada phim kwah ba ki briew kiba nabar ka jylla kin ym wan kharoi hangne ha ri Khasi Jaintia, mangi hi ngi hap kner bad trei hi noh dalade”, ong bah Alan West Kharkongor ha shuwa ban pynkup burom ïa ki.
U la kren shai ba kumba ka long mynta ka ïoh ka kot jong ka thaiñ Sohra ka hiar bad kane ka
pynkhuslai jingmut ïa u babun uba lang naba tang ka pliang ja jong ki nong Sohra kaba dei ka MCCL kaba aikam aijam ïa bun ki longiing ruh haduh ha kine ki sngi tang shi byrni ka Dewbilat ruh kam pat lah ban pynmih satia. U la kyntu ïa u symbud myntri rangbah jong ka jylla ba lada ka NPP ka wan biang ha ka bor ïa kaba u sngew thikna, ka sorkar ka dei ban leh eiei noh ban pynkhie im biang ïa ka MCCL.Kane ka pynskhem ïa ka jakpoh jong ki briew kane ka thaiñ.
U la kren shai ruh kum uwei uba la trei shitom ha kaban kyntiew ïa ka kam jngohkai pyrthei ha ka jylla ha ki snem kiba la dep ba lada u paidbah unjied ïa u, yn nang kham kyntiew shuh na kaba long mynta naba kane ruh mynta ka la kylla long sa kawei na ki pliang ja thymmai jong ki paidbah ka thaiñ Sohra. Kumban shu pynkynmaw ba u bah Alan West Kharkongor u dei u Chairman jong ka Meghalaya Rural Tourism Forum (MRTF) bad ka jingkwah jong u Myntri Rangbah ka jylla u Conrad Sangma bad u Symbud Myntri Rangbah , u bah Pretone Tynsong ka long ba un jop, une u samla rangbah un nang ïatrei bad ka sorkar ha kaban kyntiew shuh shuh ïa ka Kam jngoh kai pyrthei ha ka jylla bad khamtam ha ka thaiñ Sohra.