Kynthah u Andrew Shullai ïa ka NPP ba ïatreilang bad ka BJP watla shah thombor ki Khristan

By Mawphor News Desk On Feb 3, 2023

Shillong, K’lyngkot, 02: U nongïalam ka All India Trinamool Congress (AITC) u Bah Awhai Andrew Shullai uba long ruh u MDC jong ka Jowai North Constituency ha ka sngi Palei u la kynnoh ba ka NPP ka long tang ka B-Team jong ka BJP.
Une u kyrtong ka TMC na Jowai u la kynthah ruh ïa ka NPP kaba la ïatehlok bad ka BJP naduh u snem 2018 wat hapdeng ka jingshah thombor jong ki Khristan naduh u snem 2014, hadien ba ka BJP ka la ïoh bat ïa u lakam synshar ha ka ri.
U Bah Shullai u la kynthah shuh shuh ïa ka TMC kaba shu kbum ïa ki rukom treikam jong ka BJP kiba triem haduh katta katta. “Ka Trinamool Congress ka dei tang ma ka, ka party kaba la sei madan ïa ki jingshisha shaphang ka BJP; ka dei kaba pyrshah ïa ki Khristan. Naduh u snem 2014, ka jingshah thombor jong ki kynhun Khristan ka la kiew bha. Namarkata, lada ka NPP ka dei kaba peit ïa ka bha ka miat jong ki paidbah, kan jin da la kiar ban ïatreilang bad ka BJP. Da ka jingïatylli, ka Meghalaya TMC kan ïai bteng ban trei shitom ban pynurlong ïa ki jingkular da kaba buh nyngkong eh ïa ka bha ka miat jong ki paidbah kum kawei na ki mat kiba kongsan,” ong u Bah Shullai.
Haba kynnoh ba ka NPP ka la pyrshang ban shu lamler tang ban shu pynbiej ïa u paidbah, u Bah Shullai u la bynrap, “ki nongïalam ki la trei shitrhem khlem shongthait ban buhrieh ïa ki jingshisha ba ka NPP bad ka BJP kin thaw ïa ka Sorkar MDA. Ka NPP hi ka dei ka B-Team jong ka BJP.”
Shuh shuh u la ong, “ngi la ïoh jingtip na ki lad pathai khubor ha kaba ki nongïalam ka NPP ki la kam ba ka TMC ka kham sngewtynnat ban kynthoh ïa ka BJP ban ïa kaba peit ïa ki kam pynroi ha Meghalaya. Kane ka pynpaw shai ba ka TMC ka dei tang ma ka, ka party kaba shlur ban aireng ïa ka BJP hadien ba ka la iehbeiñ ïa ka Meghalaaya bad ïa ki jingdonkam jong ka.”
U Bah Shullai u la ong ba u “sngewkmen” ban shem ba ki seng saiñpyrthei ki la thung da ki nongaiktien tang ban ïaleh pyrshah bad ka TMC. “Kane ka pynti ba ngi la leh ïa kaba bha bad ka la pynkyiuh ïa ki party kiba don ha ka liang synshar,” u la ong.
Ka Meghalaya TMC ka ju ïai kren na ka por sha ka por ba ka jingïatreilang hapdeng ka NPP bad ka BJP ka Congress kam shym la lah satia ban shim kabu kum ka Liang Pyrshah ba khlaiñbor ha ka jylla.
Ha kaba ïadei bad ka jingkyrshan jong ki paidbah ïa ki song jingïarap ba la pynbna da ka Meghalaya TMC kum ka WE Card bad ka MYE Card, u Ba Shullai u la ong, ‘ban beiñ ïa kine ki skhim ka long kumba beiñ ïa ka jingdonkam jong u paidbah.”
Haba kob ïa ka NPP lada ka shlur ban pynpaw paidbah ïa ki jingtrei ki jong ka, u Bah Shullai u la ong, “kito kiba kren pyrshah ïa ki 10 tylli ki jubanlak jong ka TMC ki dei ban ai jubab, haei ka Report Card jong phi pat? Ka jingshisha ka paw ba ka NPP kam shym la lah ban pyndep ïa ka thong bad ban pynbiang ïa ki jingdonkam kiba rit eh sha ki paidbah. Namarkata, kim shym la lah ban wanrah ïa ka Report Card jong ki.”
“Ka NPP ka dei ka nongshim kabu bad ka bym don jingkitkhlieh. Ka Meghalaya kan sa wanrah ïa ka jingkylla ha kane ka kynti. Ka Trinamool Congress ka dei ka party kaba kren ïa ka jingsngew jong ki paidbah jong ka Meghalaya,” la bynrap u Bah Shullai.