Nongpoh, Rymphang 05: U MLA ka Nongpoh u Bah Mayral Born Syiem mynta ka sngi u la lum ïa ki ophisar na ki tnad sorkar bapher bapher ryngkat ki nongïalam shnong jong ka Mawlong Nongtluh na ka bynta ban buddien ïa ki kam pynroi ha katei ka shnong, khamtam ki jingdonkam ba hakhmat eh bad ki jingmyntoi ba ki paidbah ki dei ban ioh na ka sorkar ha ka jingïalang kaba la long ha iing Dorbar jong ka shnong Mawlong.
Ha katei ka jingïalang la wan ruh ban don ryngkat naduh u Eric Dkhar BDO ka Umling C&RD Block, ka Dr TS Momin DMHO ka Ri-Bhoi, Dr D Blah Additional DMHO, P.P Yadav BMC ka Umling Block, Bah H Langi Rangbah Shnong Mawlong bad kiwei kiwei ki nongïalam shnong jong ka shnong Mawlong Nongtluh.
Ha katei ka jingïalang ban buddien ïa ki skhim pynroi la ioh ruh ban ïakren shibun ki jingdonkam bad ki jingmyntoi ba ki paidbah ki dei ban ioh ha katei ka shnong naduh ka pule ka puthi, ka koit ka khiah, bad ki skhim bapher bapher ba ki paidbah ki dei ban ioh lyngba ka skhim MP.
Haba kren sha ki lad pathai khubor na ka liang u Bah Mayral Born Syiem u la ong ba katei ka jingïalang ka long ban buddien ïa ki kam pynroi ha katei ka shnong ba kum ka Shnong Mawlong bad kiwei kiwei ki shnong ba marjan kila ap khmih lynti la slem ban ioh noh laka jong ka Sub Center namar kumba long mynta ki paidbah khamtam ki longkmie ba armet ki shem jingeh ban leit sha ki jaka sumar namar ka jingjngai ka lynti bad ka jingsniew u surok bad kum ka shnong kala pynkhreh ruh ka jaka kaba heh hadien bala dep ban buh ïa ka jingthoh sha ka sorkar bad khamtam ba ka Village Health Council kan treikam bha ha katei ka shnong ban lah ban pyntreikam bha ïa katei ka Sub Center.
Ha katei ka jingïalang la ioh ruh ban buddien ban pynrung noh ïa ka Mawlong Government LP School ha ka PMShri na ka bynta ban ioh jingïarap na ka sorkar naduh ki kamra klas, ki paiñkhana, ki tiar ki tar katkum ka juk mynta, ki kor computer ban dang pynkhlaiñ ïa ki skul sorkar ban long kum ka shlem jinghikai sha ki khynnah ha katei ka shnong bad kumjuh ki shnong ba marjan.
Shuh shuh la ioh ruh ban buddien ïa ka skhim SAGY bala dep ban thep naduh u snem 2019 na ka skhim MP jong ka sorkar pdeng ban pynthikna ba ki nongshong shnong kin ioh jingmyntoi na ki skhim sorkar hadien bala jied ïa ka shnong Mawlong Nongtluh ban long kum kawei ka shnong ban ioh jingmyntoi na katei ka skhim.
