Shongkun ka jingrakhe Jubili 100 snem ka Balang Katholik ha ka shnong Sohphoh

Mawrathud, Rymphang 05: Hadien ka jingpynkhreh kaba shisnem lynter ki ‘riewngeit Katholik jong ka Balang shnong Sohphoh kaba hap hapoh ka Parish Umsohlait, ki la pynkut ïa ka jingrakhe Jubili shispah snem ka jingwan ka jingngeit Katholik ha ka shnong jong ki, ha kaba ka Kong Ampareen M. Lyngdoh MLA, kaba long ruh ka Myntri Sorkar ka Jylla kaba dei peit ïa ka tnat ka koit ka khiah kala pynhiar ïa ka Lama rakhe jubili shispah snem jong ki riewngeit Katholik ka Shnong Sohphoh hynnin ka sngi 4 tarik Rymphang 2024, hapdeng ka kynhoi risa “Hoi, Hoi, Hoi …”bad ka jingiphuh iphieng ha kaba ki riewngeit na ki shnong kum na Mawrathud, Ingsaw, Umtngam, Lumniwar,Tyrso, Ummat bad na ki shnong ba marjan kila ïatuid sha ka shnong Sohphoh.
Hashwa ban pykut ïa kane ka sngi jingrakhe shispah snem jong ka Balang shnong Sohphoh, ha ka por 10 baje kynrong sngi, la don ka jingkñia Mas Iukharist ha kaba u Sohblei (Phadar) Gerald Khongji, Rector ka Christ King’s King College u long u kongsan ha ryngkat ka jingïasynran lang ki Lyngdohsohblei, Sohblei Leo Khrawbor Parish Priest ka Parish Umsohlait,Sohblei Edward Sten bad kiwei de ki Lyngdohsohblei.
U Sohblei Gerald Khongji haba kren ha kane ka sngi, u pynpaw ka jingkmen haba u la ïoh ïa kane ka lad ban wan sakhilang ïa kane ka sngi pynkut ïa ka jingrakhe Jubili shispah snem jong ka jingwan ka Balang Katholik ha ka shnong Sohphoh bad ai khublei ïa baroh kito kiba don kti ha kaba pynlong ïa kane ka jingrakhe Jubili kaba jop bad kaba iphuh iphieng. Haba kren shaphang ka jingwan ka Niam Katholik ha kane ka shnong Sohphoh, u la ong ba kumba u Jisu Khrist u la Seng Nongrim ïa ka Balang halor ki 12 ngut ki Apostol, kumta ruh ïa ka Balang ha shnong Sohphoh la seng nongrim da ki 12 ngut ki Khristan ba nyngkong ha ka snem 1923 bad na ki 12 ngut mynta ki don 105 tnum ïing.
Shuh shuh u Sohblei Gerald Khongji haba ïathuh ïa ka jingïaid lynti jong ki riewngeit hapoh kine ki shispah snem khlem pep ki la ïaid ha ka lynti kaba jlieh, ha ka lynti kaba khohruh khohram, ki la ïaid lyngba ka Ding lyngba ka Um, hapdeng kiba bun ki jingtynjuh, hynrei hapdeng kane ka lynti ki la ïaid lang bad U Trai Jisu Khrist Uba long U Nongap Langbrot babha Uba ïalam ïa ki sha ka Lyngkha Phlang kaba jyrngam bad ka jingngeit ha kane ka shnong Sohphoh ka la roi bad kan nangroi ha ki snem bad ha ki por ki ban dangwan. Nangta u Sohblei Khongji u ong ba ha ki snem kiba nyngkong ki riewngeit kane ka shnong (Sohphoh) ki hap hapoh ka jingpynïaid jong ka Parish Laitumkhrah, haba la plie ïa ka Parish Mawlai ha ka snem 1933, ki hap hapoh ka Parish Mawlai, ha ka snem 1952, ki hap hapoh ka Parish Nongpoh bad haba la plie ïa ka Parish Umsohlait ha ka snem 1972, ki hap hapoh ka Parish Umsohlait.
Nangta u Phadar Khongji u ong ba ha kine ki shispah snem kane ka shnong (Sohphoh) ka la ïoh bun ki jingkylla kyrteng na ka kyrteng Lumsohniru sha ka kyrteng Madan Bhoi na ka Madan Bhoi sha ka kyrteng Madan-khah na ka kyrteng Madan-khah sha ka kyrteng Sohphoh. Kum juh ha ki shispah snem bun ki jingkylla na ka ïingmane sherdara sha ka ïingmane Phlang, na ka ïingmane Phlang sha ka ïingmane Dieng bad na ka ïingmane Dieng mynta sha ka ïingmane Dewbilat. Ka jingkylla kyrteng ka wan rah ïa ka jingmyntoi na u Abram sha u Abraham, u Jacop sha u Israel, u Simon sha u Petrus, u Saulus sha u Paulus. Kum juh ïa ka ïingmanena ka ïingmane jong u Paulus sha ka ïingmane jong u Petrus bad mynta sha ka ïingmane u Francis Assisi bad ym sngewphylla eiei ong u Sohblei Gerald Khongji kine ki jingkylla ka dei ka lynti ïaid ba U Blei U la btin lynti ïa ki khun Khristan jong ka Balang shnong Sohphoh. U Sohblei Khongji u pynkut da kaba ong ba kane ka jingkylla ka long ka lynti jong ka jingpynjanai jong u Blei bad ka jingkhot ïa ki briew sha ka jingpynjanai ha ka jinglong briew, ka kyrdan ka jinglong khunblei bad ka jingkhot ban pynlong ïa ki synran jong U Trai Jisu Khrist.
Ha kane ka sngi la wan ïa sakhilang ruh da u Bah Charles Marngar MLA ka thaiñ bad kiwei de ki riewkhmat jong ka thaiñ nalor ki Lyngdohsohblei (Phadar), ki Sister, ki Brother bad kiwei de ki riewkhmat na ki kynhun ñiam bapher bapher kiba la shah khot sngewbha.