Long ki samla kiba don ka jingthrang ryngkat ka jingminot ha ki jingpule na ka bynta ka lawei phyrnai: DC
Mawkyrwat, Naitung 31: Ka Sohliwai Development Committee, South West Khasi Hills District, ka la pynlong ïa ka Career Counseling & Youth Employment Programme kaba la kyrshan da ka ophis jong ka Deputy Commissioner, South West Khasi Hills District, hapoh ka Chief Minister’s Youth Development Scheme (CMYDS) 2025-26, ha Community Hall jong ka shnong Rangthong.
Ka jingthmu jong kane ka program ka long ban pynsngewthuh ha ki samla naduh ki shynrang bad kynthei bad kumjuh ki khynnah skul ba kumno kin pyrkhat na ka bynta ka lawei ba phyrnai jong ki la ka long ban pynleit jingmut ban ïoh ki kam ki jam ba halor ha ki kam sorkar bad kumjuh ruhban kyntiew ïa ki kam la jong lyngba ki kam trei kti bad kiwei de ki jaitkam.
Ha kane ka prokram, ka Kong Aitinolin L. Mawlong, IAS, Deputy Commissioner, South West Khasi Hills District, ka la long kum ka Kongsan, katba u Bah Lamphrang George Marboh, Additional Deputy Commissioner, South West Khasi Hills District, u la long kum u Symbud Kongsan.
Ki Resource Person ha kane ka sngi ki kynthup ïa u Bah Banteilang Kharjana, Additional Superintendent of Police, South West Khasi Hills District, uba la ai jingïathuh bad jinghikai halor ka phang “Career Guidance halor ki kam Sorkar”, da kaba batai shaphang ki lad jingïohkam, ka jingpynkhreh ïa ki eksamin bapher bapher bad ki jingdonkam ba ki samla bad ki khynnah skul ki dei ban poi sha thong jong ka jingim.
Katba ka kong Arti Lyngdoh, State Project Manager, Meghalaya, Indian Institute of Entrepreneur, Guwahari pat ka la ai jingkren halor ki lad jingïarap bad ki sienjam kiba donkam ban sdang ïa ka kam lajong (Entrepreneurship), da kaba pynshlur ïa ki samla ban seng kam bad ban thaw ïa ki lad kamai jakpoh da lade.
Ha kane ka prokram la sakhi ruh da ka jingïashim bynta shitrhem jong ki khynnah skul, ki nonghikai, ki riew rangbah bad ki longkmie na ka shnong Rangthong, kiba la ïoh jingmyntoi shibun na ki jingkren bad jingïasyllok halor ki lad ban kyntiew ïa ka jingnang jingstad, ka jingïohkam bad ka jinglah ban seng ïa ki kam la jong.