Leit sngewlem ka KSU sha ïing u rangbah ba shah pynïap dusmon ha khappud

Khliehriat, Kyllalyngkot 08 : Ka Khasi Students’ Union (KSU) Narpuh Circle mynta ka sngi jong ka 8 tarik u Kyllalyngkot ka la leit ban ïa kynduh ïa kiba ha ïng jong u (L) Salbinus Dhar, uba ju khot ieid da u Chiang Dhar na Umkiang uba la suba shah pynïap dusmon ha ki runar kiba wan na Bangladesh.
Kane ka jingleit jong ka KSU Narpuh ka long ruh kum ka jingleit ontep donburom ïa utei u rangbah uba shah pynïap.
La ïathuh ba ha kane ka sngi ka Seng ka la ïoh ruh ban ïa kynduh ïa u Rahul Pohtam uba dei u paralok uba ïa leit lang bad utei u rangbah hynrei uba la lait im da ka said na ka kti jong ki runar ha ka 06 mynta u bnai katba ki dang leit sha bri kwai.
“Haba kylli, na u Rahul Pohtam uba la lait na ka tyrsim jingïap na ka jingwan thom bor ki khar Bangladesh, u la ïathuh baroh ïa kiei kiei kiba la jïa ïa u bad ïa u paralok katba ki dang ap bad peitngor ba ïoh wan ki khar Bangladesh ban tuh kwai. Hynrei kyndit kynsan ki la wan shi kynhun bad khlem poi pyrkhat ki la thom da ka bor ha kaba kim shym la ïakhun pyrshah hynrei ki la shu phet ïap noh ïalade. U (L) Chiang Dhar u la khlad hashen ha kane ka jingshah thombor, namar ki la pom da ki wait, u Rahul Pohtam um nud shuh ban ïa khun, kumta um banse ban phet ïa lade bad leit ïathuh briew” ong ka kyrwoh.
Shuh shuh la ong ba na ka liang ka seng ka pynpaw ka jingsngewsih bad jingsngewbitar ïa kane ka jingleh riewkhlaw da kaba pynïap im im peit ïa ka mynsiem briew khlem ki daw. Ka sorkar jylla lyngba ka tnat pulit ka dei ban shimkhia ban pynlong da ka jingtohkit namar na ka liang u Rahul Pohtam u la leit ujor da ka ejahar ha Umkiang Police Patrolling Post, la bynrap shuh shuh ka kyrwoh.”
La ong ruh ba ki nongshong shnong jong kito ki thaiñ khamtam kito kiba don jaka puta kum bri kwai bad ki jaka rep kiba don ha khappud bad ka ri Bangladesh ki la shu shongsyier bad rit mynsiem bad kim nud shuh ban leit sha ki bri kwai jong ki.
Ka seng ka kynthoh ruh ba ki shipai BSF kiba don ha khappud kim leh eiei, kim lah ruh ban tehlakam ïa ka jingïoh rung tuh beaiñ ki nong Bangladesh, katba ki BSF ha surok national highway ki ieng pynheh shadem da kaba pynthut bad leh tohmet ïa ki trai ri trai muluk kiba leit ba wan.
La bynrap ruh ba katkum ka jingïathuh jong ki trai shnong ba ki trai jaka haba ki mut leit sha ki bri ki ju shah pyndik bha ha ki shipai BSF kiba shong pahara, katba ki briew na Bangladesh pat ki ïohlad ban wan rung sahuh wat haba lah ker sainar ha khappud.
Halor kane, ka seng ka dawa na ka sorkar ba ka dei ban phah noh ïa ki shipai BSF kiba don ha surok NH-6 ha Sonapyrdi bad ha khappud shnong Dona umbluh bad Ratachera ba ki dei ban leit sha khappud ban pahara bad ïada ym ban shong pahara ha surok National Highway.