Jowai, Jymmang 09: Ka Hynñiewtrep National Youth Movement West Jaintia Hills District (HNYM-WJHD) hapoh ka jingïalam u President samla Pynhun Shulet bad u samla Samjur Suiam General Secretary ha ryngkat ka jingïadon lang ki dkhot ka seng bad ki nongïalam jong ka Central body, mynta ka sngi kila leit ïa kynduh ïa ka Dr. M. Ampareen Lyngdoh kaba dei ka myntri ba dei peit ïa ka tnad ka koit ka khiah jong ka sorkar.
Kane ka jingleit kynduh jong ki ka long halor ki mat ban dawa pyntrei kam noh ïa ka Maternal and Child Health Hospital (MCH) Jowai lane ka 100 jingthiah kaba la dep plie da u myntri Rangbah duh jong ka jylla u Conrad Kongal Sangma ha ka MDA-1 naduh ka 03 tarik December 2022, hynrei haduh mynta kim shym la pyntrei kam ïa kane ka hospital kumba la plie.
Kane ka jingïa kynduh jong ka seng ka dei hadien ba la wan jurip da ka seng ha ka 5 tarik u April 2023, ha kane ka jing jurip ka seng ka la ïa kynduh ruh ïa u Medical Superintendent jong ka MCH Jowai bad na ka liang jong u ruh ula pynsngew ba dang bun shibun ki jingduna hapoh ka Hospital.
Mynta ka sngi na ka liang ka seng ka la ïa kynduh syndon bad ka kong Dr. M. Ampareen Lyngdoh ban dawa pyntreikam noh mardor ïa ka MCH Jowai ryngkat bad ki jingdonkam hapoh ka hospital kum ka SMOs, X-rays operator, Electric gadgets bad kiwei kiwei ki jingdonkam hapoh katei ka MCH hospital Jowai, ha kane ka jingï kren ka seng bad ka Health Minister, ki long kiba seisoh ka la kular ruh ban shimkhia ïa ki jingdawa jong ka seng bad ka la rai ruh bad leit jurip hi dalade ha ka 01 tarik June, 2023 ryngkat bad ki nongïalam ka HNYM-WJHD.
Ha kajuh ka por ka seng ka la leit ai ïa ka copy memorandum ha office jong ka Director of Health Service (MI) Shillong khnang ba kin ïashim khia ïa kane ka jing dawa jong ka seng, ka seng kan ïai ap ïa ka tarik ba la buh da ka myntri ka sorkar jylla.
Na ka liang ka seng ka la shim ruh ka rai ba kat bym pat lah pyndon kam ïa ka MCH Jowai kan nym shong kli kti namar kane ka jaka sumar ka dei ka ïap ka im jong ka jaid bynriew Jaiñtia baroh kawei bad ka seng hi kam nym shong thait kat bym pat pyntrei kam ïa kane ka Hospital, katkum ka kyrwoh na u President/Secretary HNYM-West Jaiñtia Hills District.
