Jowai, Jymmang 09: Ka jingïoh lad katba mon jong ki nongshong die jingdie ha ki lynti ïaidkjat ha Ïawmusiang kala ktah bha ïa ka ïaid ka ïeng jong ki paidbah babun balang kynthup naduh ki khynnah skul bad khamtam ïa ki riew tymmen ban pyndonkam ïa kitei ki lynti ïaid kjai.
Kane ka jingshong die jingdie ha ki lynti ïaid kjat kala wanrah ruh ka jingkhapñiah ïa kali ki mator kiba la lymbub lang bad ki nongïaid lynti naduh ki bynta jong ka surok Iawshyiap ter ter haduh jingkhang (Gate) jong ka DC Ophis Jowai, ym tip shuh balei kine ki nongshong die jingdei wat hadien ba la dep mana ba ym bit ban shong dei hynrei kila nang ïaibteng ban pyndonkam ïa kitei ki lynti ïaid kjat jong ki paidbah.
Halor kane ka jingeh uwei na ki riew rangbah uba dei u nongshong shnong ka sor Jowai u ma O.R. Challam ula pynsngew ba ka Iawmusiang kadei ka ïew kaba don naduh ki por hyndai hynthai bad ka long ruh ka ïew kaba heh bha hapoh ka jylla.
Hynrei katba nang mih ki por la ïohi ïa ka jingeh jong kane ka ïew bad kaba la pynsniew dur ïa ka da kitei ki nongshong die madan kiba wan rah ïa ki mar ki mata jong ki ban shong ha ki lynti ïaidkjat bad kane kala buh ha ka umdum ïa kiba bun ba lang halor kane ka jinglong jingman jong ka Ïawmusiang.
Ula ong kala dei ïa ka bor pynïaid District bad ka tnad pulit ban shimkhia mardor ïa kane da kaba weng noh ïa kitei ki nongsong die madan khnang ba kan long ka nuksa sha kiwei de, “haoid kane kan ym jia tang ha Jowai hynrei ha kylleng ki jaka wat sha ki jylla ba shabar kumjuh” ong u ma Challam.
Ka por kala dei ban kyndit bynriew ban weng noh ïa kane ka jingeh ban lait na ka jingkhapñiah ha ka ïaid ka ïew da ka jingïatreilang jong baroh, da kaba u pynsngew wat ïa ki trep ïew ba la ai jaka da ka Seiñ Raij ïa ki hynrei kitei ki nongshong die ki leit bun ïa ki mar jong ki sha ki lynti ïaid kjat bad la sakhi ha ki bynta ka nan Kashari la dap satang da ki nongdie jaiñ Second Hand.
Shuh shuh ula ai jingmut ban weng ïa kane donkam ban buh da ki pulit kumba (saw) ngut khamtam ha ka por mynstep bad ka por mynsngi, namar ka jinglong jong kitei ki nongshong dei madan ha ka por mynstep ba la dep beh ïa ki katba ha ka por janmiet kila wan ban shong die biang.
Sa kawei ka jingeh kaba mih na kane ka jingshong die madan u ma Challam ula long ka la jia na ka daw ka jingbym pyndep shuh ïa ka Iawmusiang Complex kala eh sah da ki phew phew snem haduh mynta. Lada ïa kane ka ïew la lah ban pyndonkam ym tharia ba ki nongshong die madan ki ïoh ban leh mon.
