Nongpoh, Jymmang 09: Ka Dharshnana Jardosh, kaba dei ka myntri khynnah jong ka sorkar pdeng ba dei peit ïa ka tnad Railway bad ka tnad Textiles mynta ka sngi ka la hiar sha ka shnong Diwon ha ka thaiñ Umden ha Ri Bhoi, na ka bynta ban ïa kynduh kyrpang ïa ki nongthaiñ jaiñ bad ruh ki nongshna jingshna shi bynta ban lum jingtip la ki la ioh neem ïa ki lad jingïarap ba la ïarap kyrpang da ka sorkar pdeng.
Haba leit ban jurip ïa kitei ki jaka thaiñ Jaiñ bad ki kam shna jingshna jong ki nongrep la synran lang ruh ïa katei ka myntri khynnah jong ka sorkar pdeng da ka jingdon lang u MLA ka Nongpoh, u Bah Mayral Born Syiem, u MDC ka Nongpoh, u Bah Balajied Rani, u Deputy Commissioner ka Ri Bhoi, u Arpit Upadhayaya bad kiwei kiwei ki ophisar na Ri Bhoi District.
Lyngba ka jingwan jurip katei ka myntri khynnah ka sorkar pdeng ka la long ruh ka jingkyrkhu ïa ki nongthir ksai bad ki nongthaiñ jaiñ ha ka thain Diwon-Umden ha Ri Bhoi, kiba dei ruh kiba la paw bha ha ka kam pynmih jaiñ Ryndia (Eri Silk), namar ha kane ka sngi la sam ruh ïa kita ki ID Card ba la tip kum ka Pehchan ID Card bad la sam ruh ïaki syrnot ba la tip kum ka Samarth Training Certificate bad Hathkargha Samverdhan Sahayatha (HSS) Certificate sha ki Nongthaiñ jaiñ (Handloom) bad sha ki nongshna jingshna (Handicraft).
Kum ka myntri khynnah ka sorkar pdeng, ka Dharshnana Jardosh ka la ioh ban leit jurip ïa ki katto katne tylli ki jaka kiba pynmih jaiñ bad ki ksai ryndia kiba kynthup ïa ka Design Innovation Resources Center (DIRC) kaba dang dep ban plie shen ha Ka shnong Diwon, Umden, ka Zong Hi-I bad kiwei kiwei.
La pynkut ruh ïa kane sngi ba katei ka myntri khynnah ka leit ban jurip bad ban kynduh ïa ki nongthaiñ jaiñ da ka jingïalang kaba la pynlong ha DUYA Hall ban ïa kren halor ka jingmyntoi ki nongthaiñ jaiñ ba katei ka myntri khynnah ka la kular ruh ban dang shim khia ban ai ïa ki lad jingïarap ïa ki nongthaiñ jaiñ bad khamtam kiba thaiñ ïa ki jaiñ ryndia ba ka thaiñ umden ka la paw bha ym tang ha ka jylla bad ka ri bad ha ka pyrthei hi baroh kawei.
