Nongpoh, Jymmang 09: Ban khanglad na ka jingpyndonkam ïa ki kynja ksai plastic ba pyndonkam da ki kynja plastic bad kiba ym lah ban pyut kaba buh jingma ïa ka mariang bad kaba wan rah ruh ïa ka jingpynjaboh ïa ka mariang, u District Magistrate ka Ri Bhoi District, u Arpirt Upadhayaya mynta ka sngi u la pynjari syndon da ka kyndon 144 CrPC ha baroh ki bynta jong ka Ri Bhoi District ba la khang pyrshah ban pyndonkam ïa ki kynja ksai plastic ne ki Plastic ba kane ka buh jingma ïa ka mariang.
Katkum ka kyrwoh ba la phah da ka ophis u District Magistrate ka Ri Bhoi, kane ka jingkhang ban pyndonkam, shna ne thied ïa kitei ki kynja ksai ne ki kynja plastic kiba ktah ïa ka mariang, ka dei ruh halor ka jingsdang kynrei kita ki Chinese Manjha, Synthetic Manja bad ki Nylon Thread lane kiwei kiwei ki kynja ksai ba long plastic ba pyndonkam ha kaba pynher kot kudi ne ha kiwei kiwei ki kam ba kane ka ktah jur ban pynjaboh ïa ka mariang bad ka buh jingma ruh ïa ka mei maring na ka daw ba kim pyut satia.
La pyntip ruh ba kino kino ki kynja plastic ne ki ksai plastic lada ym tehlakam ki ktah ym tang ïa ka mariang bad haba bret sha ki Nala ne ki wah ka set ïa ki nala kaba wan rah shuh shuh ka jingjaboh bad ka jingma ïa ka mariang. Nalor kata, kitei ki kynja ksai plastric ki bym pyut ki buh jingma ruh ïa ki mrad bad ki sim ki doh bad ki don ruh ïa kata ka bor ban pynjot wat ïa ki kynja tiar kiba pyndonkam ha kaba tan bording ïa ki paidbah.
Namarkata, kane ka kyndon 144 CrPC ba la pynjari da u District ka la khang pyrshah ban pyndonkam ïa kitei ki kynja plastic ne ki kynja ksai ba long plastic ba ki paidbah kim dei ban thied, shna ne pyndonkam bad lada don kiba ïaleh pyrshah kin shah pynshitom katkum katei ka kyndon ba la pynjari da u District Magistrate ka Ri Bhoi.
