Maham ka KSU ba lada ki shipai BSF kim mih na Sonapyrdi kan poi shaduh u pud ban iapyni bor

Khliehriat, Jymmang 9: Ka Khasi Students Union Huroi Unit, hapoh ka jingialam u President ka Unit, u samla Wallam Lamin Gadew bad u Vice-president, u samla Gilbertstar Khonglah, mynta ka sngi ka la ioh ban iakynduh markhmat bad ka kong Santa Mary Shylla ha ka jingleit jurip jong ka ia ka shnong Huroi bad ki dawa na ka ba ka dei ban shim khia ban pynkynriah noh mardor ia ki shipai Border Security Force kiba ju shong ap pahara ha surok national highway ha Sonapyrdi bad la kynnoh ruh ba ka dei kaba beaiñ ba ki shipa iada khappud kin wan shong pahara ha surok national highway.
Ki nongialam ka KSU Huroi Unit, ki ong ba katei ka jingap pahara ki shipai BSF ka dei ka jingshna ktem beaiñ jong ki bad ka buh jingeh ruh ia ki nongleit nongwan kiba na ka Lejri, Lailong, Huroi kiba dei ban iaid lyngba na katei ka jaka ba don ki shipai BSF ha jingkieng ha Sonapyrdi bad ong ba ki la kylla long mawjynthut ia ka leit ka wan ki paidbah ka thaiñ khappud “Ym lah shuh ban ñiew la katno sien ba kine ki shipai iada khappud ki leh beiñ bad pyndik ia ki paidbah ba iaid lynti na katei ka jaka, ka jingdon jong ki ka kylla long ka jingsyier ia ki kynthei ki khynnah ruh namar ba kitei ki shipai BSF kim ju salia ban ktah kti wat ia ki khynnah skul ruh. Ka jingkylli mynta ka long ba kumno kitei ki shipai ki iohlad ban shong ban thaw ktem ha wat ha surok National Highway ruh, balei ka sorkar kam phah ia ki sha ki jaka khlaw ba ha khappud bad ka Bangladesh ban peit ngor ia ka jingrungtuh ki khar Bangladeshi kiba ju thmu ban wanrung beaiñ sha ri India?” pynpaw kitei ki nongialam ka KSU kiba na Huroi.
Ha katei ka jingiakynduh ki nongialam ka seng bad katei ka MLA ka thaiñ, ki la pynsngew ruh ia ki jingeh jong ki paitbah nongshong shnong jong ka thaiñ khappud naduh shnong Lejri, Lahaleiñ bad ka shnong Huroi, ha kaba iadei bad ka jingktieh bad jingjyrsieh palat ka surok.
Ha kaba iadei bad ka jingdawa ban weng noh mardor ia ki shipai BSF na jingkieng Sonapyrdi, la ong ba na ka liang ka kong Santa Mary Shylla kaba dei ka nongmihkhmat na ka thaiñ, ka la kular hakhmat ki nongialam ka KSU Huroi Unit ba kan shimkhia halor kane ka mat kaba ka seng ka la dawa bad ka la kular ruh ban shimkhia bad ban pynsngew ia kane sha ka sorkar jylla bad kumjuh ruh sha ki bor ba dei peit ia ka tnat ki kam poh iing (Home) jong ka sorkar India, ka la ong ruh ba kan ia trei ryngkat ryngkat lang halor kane ka mat jingdawa jong ka seng.
Lyngba u kyrwoh, ka seng, ka buh ki jingmaham bad ong ba “Kumban shu pynkynmaw ba ka jingdawa pynkynriah jong ka Seng ia kane ka ktem shipai kaba don ha jingkieng ha ha Sonapyrdi, kam dei shuh ka ba dang thymmai hynrei ka dei ka mat kaba ka seng ka la dawa na ka por sha ka por, namar mynta hi ha katei ka jaka kam dei shuh ka ba dang shngaiñ ia ki paitbah ha ka leit ka wan, namar ka jingleh donbor bad leh riewkhlaw jong ki ne ki shipai BSF ka long sha ba palat, kumta na ka liang jong ka Seng ngi kyrpad jur bad dawa jur na ka sorkar jylla bad kumjuh ruh na ka MLA jong ka 5-Sutnga Saipung ba kin leh kloi noh ha kaba iadei bad kine ki shipai katba ka jingjia kaba sngewsih kam pat jia ha katei ka jaka. Ka seng ka maham ruh ia kitei ki shipai ba ki dei ban mih noh shi syndon na katei ka jaka kaba ki ap pahara ha jingieng Sonapyrdi bad lada kitei ki shipai jong ka sorkar kim sngew ia kane ka jingmaham jong ka Seng, ka lah ban poi ruh shaduh u pud ban hap ban ia pyni bor”.