Leit kynduh EE MePDCL ka KSU ba kynduh jingeh ki paidbah bad na ka jingbam sarang ki post elektrik

Ka jingpynlip light katba mon ha Ri-Bhoi ka la ktah ïa ki paidbah

0

Nongpoh, Ïaiong 17: Namar ka jingsngewkhia kaba jur halor ka jinglip light khah khah ha Ri-Bhoi, khlem buh por bad ka jingshong syier ki paidbah na ka jingbam sarang jong kiba bun ki post elektrik, ka seng Khasi Student Union, Nongpoh Circle mynta ka sngi kala leit ban ïakynduh syndon ïa u EE ka tnad MePDCL, Nongpoh Division ban wad jingtip ïaka daw jong ka jingpynlip light bad leh katba mon khlem da pyntip sha ki paidbah, namar kane kala ktah shisha ïaki kam ki jam, ki samla pule haka district.
Ha katei ka juh ka sngi kala naka liang ka seng kala ujor ruh halor ka jingbam sarang jong ki post elektrik haka shnong Mawdaron, Saiden bad kiwei ki shnong kaba ap jingma ïaki paidbah ha kum kane ka aiom slap bad lyer hadien ba naka liang ki nongïalam ka seng kila leit ruh ban jurip dala ki jong ki khmat halor ka jingma bad kum ka seng kam kwah ba ka tnad MePDCL kan shimkhia tad haduh ban da mih ki jingjia ba sngewsih.
Hadien ka jingïakynduh ka KSU bad u Executive Engineer jong ka MEeCL Nongpoh Division, u Samla Baïashanlang Kharshanlor Secretary ka KSU Nongpoh Circle u la ïathuh ba naka liang ka seng ka la leit khnang ban jurip ïa kitei ki post elektrik ka long ban sakhi hi da la ki jong ki khmat bad la lap shisha ba ki post elektrik ha kitei ki jaka kim long shuh namar ki la bam sarang bad kane ka pynap jingma ïaki nongshong shnong bad ki ïing ki sem kiba don marjan.
U Samla Baïashanlang Kharshanlor u la ïathuh ba ha kane ka jingleit ïa kynduh ïaki bor jong ka tnad MePDCL la ïoh ban ïakren bad u Executive Engineer bad naka liang ki nongïalam ka KSU ki la pynpaw ïa kine ki jinglong jingman jong ki post elektrik ba kim long shuh kiba skhem bad ki la pynpaw ruh ba ki paidbah ki ba sah marjan ki shong syier namar ki sainar elektrik ki ïaid lyngba ki ïing ki sem jong ki khamtam ha kume kane ka aiom slap bad ler ba kitei ki post elektrik ki lah ban khyllem ha kano kano ka por kaba lah ruh ban wanrah ka jingjia ba sngewsih.
Shuh shuh u la ïathuh ruh ba na liang jong u EE u la long kloi ban shimkhia ban pynbeit ïa kane ka kam bad naka liang ki nongïalam ka KSU Nongpoh circle ka la kyntu ba ki dei ban pyndep noh kham kloi khnang ba ki paidbah kin shong shngaiñ ha kum kine ki por lyer bad por slap.
U Samla Baïashanlang u la ïathuh ruh ba kum ki nongïalam jong ka KSU ki la dep ruh ban pynpaw ïa ki jingeh halor ka jingpynlip bording elektrik kaba khah khah ha ka thaiñ Ri-Bhoi kaba la ktah shibun ïaki riew seng kam shimet bad khamtam ïaki Samla pule. Halor kane ka mat naka liang ki nongïalam ka KSU ka la buh ka jingkyrpad ïa ki nongpeit jong ka bording elektrik ba kin ailad ba ka bording kan meh haki por mynstep, mynsngi bad janmiet namar kitei ki por ki paidbah ki pyndonkam bha ïaka light bad ki la kyntu ruh ba kin pynlip ha kapor mynmiet namar ki paidbah haka por mynmiet ki duna ban pyndonkam ïaka light, u la bynrap.

Leave A Reply

Your email address will not be published.