Leit seng ka HBDRF ïa ka Synjuk Waheh Chnong Labang Nangphyllut

0

Jowai, Ïaïong 17: Ka long ka sngi jingsahkynmaw haka history jong ka Synjuk Waheh Chnong Elaka Labang Nangphyllut ba haka 15 tarik Iaïong 2023 la ïoh ban seng ïa kane ka Synjuk da u Chandame Sungoh Chairman jong ka Hynñiewtrep Border Disputed Redressal Forum (HBDRF) bad u Acting Dolloi jong kane ka Elaka u Prolin Samaiang haka jingïalang kaba long haka shnong Mooriap riad Labang Block-1.
Ha kane ka jingïalang la don 14 ngut ki Waheh Chnong napdeng ki 20 tylli ki shnong kiba don hapoh ka Elaka. Daka jingïarai lang jong kine ki 14 ngut ki Waheh Chnong la mynjur ban pynshkem noh ïaka ne ka Synjuk ki Waheh Chnong Labang Nangphyllut. Katba ïaki nongkitkam bad ki guidelines bad ki aiñ ki rules kiba ïadei bad kane ka Synjuk te yn sa jied bad pynshkem haka wei pat ka jingïalang kaban sa long shen.
Ki Waheh Chnong kiba don lang hakane ka jingïalang ki long u Loukas Shadap Waheh Chnong Nongjrong, u Ping Samaiang Waheh Chnong Moorap, u Loi Thaiang Waheh Chnong Mooriap, u Joplin Sutong Waheh Chnong Laher, u Jra Thaiang Waheh Chnong Umsalait, u Sting Shadap Waheh Chnong Bandeiñ, u Jra Larom Waheh Chnong Khyndeliar, u Six Lyngdoh Wahen Chnong Mooknor, u Kaïaphas Sutong Waheh Chnong Syrlong, u Rostom Larom Waheh Chnong Mynju, u Monsingh Lyngdoh Wahen Chnong Mookhim, u Kris Bhoi Waheh Chnong Arbon, u Petrus Samaiang Waheh Chnong Lamarang, u Waheh Chnong Phlang, ki Secretary bad ki riew rangbah jong kine ki shnong, lawan sakhi lang ruh daki spah ngut ki paidbah kynthei bad shynrang.
Nalor ka jingseng ïaka ne ka synjuk la ïoh ruh ban pynsngewthuh ïaki paitbah halor ka nongrim bad ka jingshisha hakaba ïadei bad ka jingïaleh ïa kaba re-transfer biang ïaka Block-1 sha Meghalaya.
La rai ban leit ïakren bad buddien biang ïaka memorandum ba la dep ai sha u CEM ka Jaiñtia Hills Autonomous District Council haka 28 tarik Kyllalyngkot 2022 halor ka phang Re- unification of the Elaka Labang Nangphyllut Dolloiship. La rai ruh ban leit ïakren bad u Deputy Commissioner jong ka West Jaiñtia Hills ki MLA’s bad sha ki Ministers jong ka jylla Meghalaya haka jingïadei bad ka Election Photo Identity Card enrollment haka ba kin ïoh ban enrollment haki shnong lajong.
Yn dawa ban pyndep noh kloi kloi ïaka kam pynbeit pud hapdeng ka jylla Meghalaya Assam bad ban re-transfer noh ïaka Block-1 sha Meghalaya. Ki paitbah katei ka thaiñ ki kyrpad bad dawa ruh ïaka sorkar Meghalaya ba kam dei ban pdiang lane soi ïaka MOU lymda ka sorkar Assam ka kloi ban re-transfer ïa kane ka jaka kumba la dep propose naduh ka 23 tarik Rymphang 1958.

Leave A Reply

Your email address will not be published.