Nongpoh, Ïaiong 17: U MLA jong ka Nongpoh Constituency u Bah Mayral Born Syiem haka jingïasynranlang jong u MDC ka thaiñ ki la nang iai bteng ban leit ïakynduh ïaki shnong kiba la ai ïaka jingkyrshan kaba khlaiñ ha kane ka elekshon MLA kaba dang shu dep, ha kaba mynta ka sngi u tei u nongmihkhmat u la leit ban ïakynduh ïa 3 tylli ki shnong ba kynthup ïaka Shnong Jermanai, ka shnong Umsaw Nongbri bad ka shnong Mawryngkang.
Naka liang u MLA kumba u la kular shuwa ka elekshon, u la ai ruh da ka khusnam momento bad ka song pisa sha kitei ki shnong kiba la wan shakhmat eh ban ai ka jingkyrshan kaba khlaiñ ha kane ka elekshon kaba la dep kum ka jingsah jingkynmaw halor ka jingai jong ki ïaka jingkyrshan ba rahbah ban pynjop donburom ïa u ha kane ka elekshon MLA kaba dang shu dep.
Ha katei ka ka jingleit ai khublei kyrpang ïa kitei ki Polling Station ha kitei ki 3 tylli ki shnong la wan ban sakhilang da ki paidbah jong kitei ki 3 tylli ki shnong kumba ka jingtrei shitom jong ki paidbah kala urlong ban pynjop donburom ïa u bad kyrmen ruh ba nangne shakhmat naka liang jong u bad ki paidbah kin ïa treilang ban wanrah ki kam pynroi.
Haba kren ha kitei ki jingïalang pynkup burom naka liang u Bah Mayral Born Syiem u la ai ka jingkhublei ba kyrpang ïa ki paidbah baroh kiba don ha kitei ki polling station ba dei namar ka jingtrei shitom jong ki ba u la ioh ïaka jingjop donburom ha kane ka elekshon, watla kiwei kiwei ki polling station kila pyrshang katba lah ban ai ka jingkyrshan, hynrei kitei ki dei ki namtam bad kiba hakhmat ba bun tam ka jingioh vote.
U la ong ruh ba kum u nongmihkhmat un pyrshang ban wanrah ki kam pynroi bad ki jingïatreilang bad ki nongïalam shnong ban pynkylla dur ïaki shnong jong ka Nongpoh Constituency naka bynta ka burom bad ka jingmyntoi jong ki paidbah, u la bynrap.
