Nongpoh, Ïaiong 17: Ka Synjuk ki Rangbah Shnong Ri-Bhoi District kala rai ban lum syndon da ka jingïalang jong ki baroh ki Rangbah Shnong ha Ri-Bhoi District namar ka jingsngewkhia kaba jur halor shibun ki mat kiba ktah ïaki Rangbah Shnong bad ka imlang ka sahlang khamtam ka jingpynmih rai jong ka District Council ban khanglad ïaki nongsynshar shnong ban shim bynta haki kam Saiñ Hima Sima.
Haba kren sha ki lad pathai khubor naka liang ki nongïalam ka Synjuk ba kynthup ïa u Bah BB Makdoh Chairman bad u Bah PB Sylliang Secretary, kila pynpaw ba kum ki nongïalam jong ka kynhun ki Rangbah Shnong kila shim ïaka rai ban pynlong da ka jingïalang haka 19 tarik mynta u bnai ha Umsning Auditorium naduh ka por 10 baje mynstep, ban shong pyrkhat halor shibun ki mat kiba ktah mationg ïaki nongsynshar shnong bad ka imlang ka sahlang.
Kila ong ruh ba katei ka rai jongka District Council ka long ka bym lah ban pdiang, namar ki Rangbah Shnong ki long laitluid haka kam kaba ki shakri, bad kum ki Rangbah Shnong kim lah ban pdiang ïa katei ka rai namar watla ki Rangbah Shnong ki shim bynta haka kam saiñ hima sima, kim don pat ka hok ban leit pynbor ïaki paidbah ban thep vote namar ka rai hi ka shong haki paidbah ïano ki ibit ban jied kum ki nongmihkhmat.
Kila ong ruh ba nalor ka rai jong ka District Council ban khanglad ïaki Rangbah Shnong ban shimbynta haka kam saiñ Hima Sima, naka liang ka synjuk kan ïatai ruh halor ka jingremdor palat ka bai register khyndew, ka jingpynbeit pud bad ka sorkar Assam haka wat ba ar, ka Roster system ka bhah thungkam thungjam bad kiwei kiwei.
Kumta naka liang ka Synjuk ka khot ka wer ïa baroh ki Rangbah Shnong ka Ri-Bhoi ban poi ryntih ha katei ka sngi bad katei ka jaka, khnang ba yn lah ban ïakren bad ïatai ïa kitei ki mat kiba dei ki kam ïap kam im jong ka jaitbynriew kila bynrap.
