Mih ka huri hura ba wan thung mar rep ki Karbi Moothade da kiba neh slem ha Mowjem

Leit kynduh DC ka HBDRF bad nongïalam shnong ka Mowjem

0

Jowai, Ïaïong 17: Ka Hynñiewtrep Border Disputed Redressal Forum (HBDRF) hadien ba la ïoh jingtip ïa ka jingwankyntur pud ka shnong Moothade (Karbi) shapoh u pud u sam ka shnong Mowjem (Pnar), mynta ka sngi kila leit ïa kynduh ïa u Deputy Commissioner ka West Jaiñtia Hills District bah B.S. Sohliya ha ophis treikam jong ban pynsngew ïa kane ka jingeh ki nongshong Pnar ba shong ba sah ha Block-1
Na ka liang ka Hynñiewtrep Border Disputed Redressal Forum bad ki nongïalam shnong ka shnong Mowjem katkum katei ka memorandom jingujor, la ong ba ki nongshong shnong Karbi Moothade kila wan kyntur shapoh u pud u sam jong ka shnong Mowjem haka jaka kaba tip kyrteng Pdeiñ iawmuksoo haka jingheh kumba 1 km sawdong ei ei daka ba wan thung ïa u synshar bad ki dieng kwai ki mar ba neh slem.
Khnang ban ïada ïala u jong u pud u sam ki paid nongshong shnong jong ka shnong Mowjem ruh ki la ïamih paitbah haka 15/4/2023 bad pynjulor ïa kine ki jingthung jingtep jong ki. Hynrei naka liang jong ki Karbi pat ki ai jingujor FIR pyrshah ïa ki briew ka shnong Mowjem ha Jrikyndeng Police Station haka 15/4/2023 bad la phah wan ïa ki ha Mookoilum Police Outpost haka 17/4/2023.
Halor katei ka jaka kitei ki nongshong shnong na ka Mowjem kila pynsngew ba ki don ki kot ki sla ban pynshisha ba kane ka jaka ka dang dei hapoh u pud u sam jong ka shnong jong ki. Kala don ruh ka jingïathoh jingïasoi hapdeng jong kitei ki Karbi bad ka shnong ba ym dei ban thung synshar lane kino kino ki jingthung kiba nehslem namar ka ktah pat ïaka rep ka riang jong ki paid nongshong namar baroh ki nongshong shnong Pnar ki im daka rep kba.
La ïathuh kum kine ki jingjia ki shait jia ha u snem 2018 bad ha u snem bala dep ruh, hynrei ka la poi sha ka jingïasuk bad ïathoh ïaka kot jingïasuk ba ym dei shuh ban pteng ïaka kum kane ka jingïakhajia hynrei na ka liang jong ki pat kim burom ïakane bad pteng biang ïa kane ka kam bymman.
Namar ba ka Block-I ka dang don hapdeng ka jingïakhajia pud bad ka jingïakam trai kylliang na ka liang ka seng HBDRF bad kitei ki nongïalam shnong ka Mowjem kila buh ka jingkyntu na utei u khliehduh ka District ba un shimkhia ïa kane ka kam ban wanrah ïaka shongsuk shongsaiñ bad ban pynïoh ïa u pud u sam uba tikna kumba long naduh hyndai hynthai bad katkum ki jingthoh jingtar.
U ma Chandame Sungoh Chairman Hynñiewtrep Border Disputed Redressal Forum ha ka jingkren sha ki lad pathai khubor ula ong halor kane ka jingïakhajia kitei ki ar tylli ki jaitbynriew, na ka liang u DC ula pynsngew ba kan don ka jingïakynduh lang jong baroh Ar District haka 19 tarik u Ïaïong ha Jowai naduh ki DC, SP West Karbi Anglong bad ki nongïalam ka Karbi Anglong Autonomous Council.
“Ha ka jingshisha kitei ki nong Karbi (Moothade) kila ïoh jaka ban shong ban sah ha katei ka jaka ka long da ka jingkyrpad jong ki na ki shnong kata na ka Mowjem bad Deiñler ban ai jaka ïa ki shipor hadien ba kila shah beh na shilliang ka wah Kupli wah kuliang Kaziranga National Park Assam ha u snem 16-25 AD hynrei mynta kila kam trai pynban bad kim burom shuh ïa jingïateh soskular bad kitei ki shnong haduh ba la wanrah ki jingïakhajai man ka por, ong u ma Sungoh.
Ula phah ruh ïa ka khubor sha ki jait bynriew Karbi ha Moothade ba kin long kiba jai jai bad kiba ïaishah na ka bynta ka jingshong suk, hynrei lada kim lah ban leh ïa kane la dei ïa ki ban mih noh na katei ka jaka kaba dang dei ki jaka jong ka jylla Meghalaya.
U ma N Sten Secretary Chnong Mowjem ula pyntikna ba katei ka jaka ka dang hap hapoh u pud u sam jong ka shnong bad ki don ïa ki kot ki sla bad ki mab ban pynshisha ïa kane, ula ong ruh wat ïa ka Dispensary ki briew Karbi kila wan shna jubor hapoh ka khlaw jong ka Presbyterian Mowjem.

Leave A Reply

Your email address will not be published.