SHillong, Ïaiong 17 : Ki heh ka tnad ka Koit ka Khiah ka jylla hapoh ka jingïalam jong u Secretary ka tnad, u Ramkumar S, IAS dang shen u la leit ban jngoh ïa ki jaka ai jingsumar ha kylleng ki distrik ka jylla ha ka jingleit jngoh ba san sngi jong u ban buddien ïa ka jingtreikam ki jaka sumar bad ruh ban pyntikna ba ki nongshong shnong kin ïoh ïa ka jingsumar kaba paka.
Ki jaka ba utei u heh ka tnad u leit ban jurip ki kynthup naduh ka East bad West Jaintia Hills, East Khasi Hills, Ri Bhoi, North Garo Hills bad ruh ka East Garo Hills, South Garo Hills, West Garo Hills bad kumjuh ha South West Garo Hills.
Katei ka jingleit jngoh ïa kitei ki jaka sumar ka long da ka thong ban kyntiew ïa ka rukom ai jingsumar ha ka jylla bad ruh ban pyntikna ba ka jingim jong ki nongshong shnong kan nang jlan da ka jingdon ki jaka sumar kiba lah ban ai jingiada lypa, nangta ki jaka kha khunlung kiba biang bad ruh ki jaka ai tika, kiban pynduna ïa ka jingïap ki longkmie por armet bad ki khunlung por ba kha.
Ha kane ka jingleit, ki heh ka tnad ki la ïoh ruh ban ïa syllok bad ïoh lum ïa ki jingtip kiba kum ki nongtrei ka tnad ka koit ka khiah ki kynduh ha ki jaka sumar, la ka long ha ka jingtreikam, ka jingdon ki nongwan shah sumar ne wan shim dawai bad ruh ka daw ka jingïap ki briew, ka jingïap ki longkmie armet bad ki khunlung ba dangkha, ka jingïaid ka jingai tika bad kiwei kwei.
Ki heh ka tnad ki leit ruh ban jurip ïa ki jaka ai jingsumar, nangta ïa ki dawai ban pyntikna ba ka jingtreikam kan long kaba ïaid beit kynthup wat ïa ki jaka test ruh.
Na ka liang u Secretary ka tnad ka Koit ka Khiah u ai ruh ka jingïaroh ïa ki nongtrei ka tnad bad kular ruh ban ai ka jingkyrshan kaba pura na ka bynta ban pynbha ïa ka jingshakri.
