Leit jngoh ki nongpeit pyrman ka ECI sha ki Polling Station jong ki 5 tylli ki constituency ka Ri-Bhoi

Nongpoh, Rymphang 12: Na ka bynta ban ïaid beit ïaid ryntih ka jingpynkhreh ïa ka election 2023 hapoh ka jylla bad ruh ba kan nym don kano kano kaba ktah ïa ka shongsuk shongsain ha ka election jied nongmihkhmat kaba long ha ka 27 tarik u Rymphang 2023 ha ka jylla, ki nongpeit pyrman na ka Election Commission of India kila leit ban jngoh ïaki jaka thep vote ne ki polling station bapher bapher jong ki 5 tylli ki Constituency ka Ri-Bhoi District ban peit ïaki jinglong jingman jong ki jaka khnang ba ka elekshon kan long kaba ïaid beit ïaid ryntih.
Kitei ki nongpeit pyrman ki kynthup ïa u K Veera Raghava Rao ba dei peit ïaka 9-Nongpoh, 10-Jirang Assembly Constituency, u Narendra Kumar Dugga ba dei peit ïaka 8-Mawhati, 11-Umsning bad ka 12-Umroi Assembly Constituency kila leit ban jngoh ïaki Polling Station ryngkat bad ki Zonal Magistrate, ki Sector Officers, Sector Police Officers bad ki Booth Level Officers.
Kumba long mynta ka jingpynkhreh naka bynta ka elekshon ban jied ïaki nongmihkhmat sha ka ïing Dobar thawaiñ ka jylla kala ïaid shaid shaid bad naka liang kitei ki nongpeit pyrman kila pynlong ka jingleit jngoh bad jurip ban pynthikna ba ka jingpynkheh kan long kaba biang naduh ka jingdonkam haki Polling Stations khamtam ban kam dei ban don kano kano ka jingpynthud ïaki paidbah kiba leit ban thep vote bad bthah ruh ïaki ophisar ba ki dei ban pyndep la ki kamram katkum ka jingbthah ka Election Commission of India khnang ba ki paidbah ki ioh ban mih ryntih haka 27 tarik kaba dei ka sngi thep vote khlem kano kano ka jingshah pynthud.